സ്വർണവില കുത്ത​നെ കൂടി

കൊച്ചി: സംസ്ഥാനത്ത് സ്വർണവില കുത്തനെ കൂടി. അഞ്ച് ദിവസത്തിനിടെ 1000 രൂപയാണ് സ്വർണവിലയിലുണ്ടായ വർധന. ഒക്ടോബർ ഒന്നാം തീയതി 37,200 രൂപയായിരുന്നു പവന്റെ വില. എന്നാൽ, ഇന്ന് പവന്റെ വില 38,200 രൂപയായി വർധിച്ചു.

കഴിഞ്ഞ ദിവസം 37,880 രൂപയായിരുന്നു ഒരു പവൻ സ്വർണത്തിന്റെ വില. 320 രൂപയാണ് സ്വർണത്തിന് ഇന്നു മാത്രം വർധിച്ചത്. 4775 രൂപയാണ് ഗ്രാമിന്റെ വില. ഒരു ഗ്രാം സ്വർണത്തിന്റെ വിലയിൽ 40 രൂപയുടെ വർധനവ് രേഖപ്പെടുത്തി.

അതേസമയം, അന്താരാഷ്ട്ര വിപണിയിൽ സ്വർണത്തിന് നേരിയ ഇടവുണ്ടായി. തകർച്ചയിൽ നിന്നും ഡോളർ സ്ഥിരത കൈവരിച്ചതാണ് സ്വർണത്തിന്റെ വിലക്കുറവിനുള്ള കാരണം. എങ്കിലും സ്വർണനിരക്ക് ഇപ്പോഴും ഔൺസിന് 1700 ഡോളറിന് മുകളിലാണ്. സെപ്റ്റംബറിന് ശേഷമുള്ള ഏറ്റവും ഉയർന്ന നിരക്കിൽ തന്നെയാണ് സ്വർണം ഇപ്പോഴുമുള്ളത്.