സ്വർണവിലയിൽ വൻ വർധന

കൊച്ചി: സംസ്ഥാനത്ത് സ്വർണ വില ഗ്രാമിന് 50 രൂപ വർധിച്ച് 4925രൂപയും 400 രൂപ പവന് വർധിച്ച് 39400 രൂപയുമായി.അന്താരാഷ്ട്ര വിപണിയിൽ സ്വർണ വില ഔൺസിന് 1799 ഡോളറും രൂപയുടെ വിനിമയ നിരക്ക് 81.12ലുമാണ്.2022 മാർച്ച് 6ന് സ്വർണ വില ഗ്രാമിന് 4940 രൂപ വന്നതിന് ശേഷമുള്ള ഉയർന്ന നിരക്കാണിത്. അന്താരാഷ്ട്ര വിപണിയിൽ സ്വർണ വില ഔൺസിന് 2046 ഡോളറായിരുന്നു അന്നത്തെ വില. രൂപയുടെ വിനിമയ നിരക്ക് 76.10ലുമായിരുന്നു.

അന്താരാഷ്ട്ര വിപണിയിൽ എട്ട് മാസത്തിനിടെ സ്വർണവിലയിൽ 250 ഡോളറിനടുത്ത് കുറവ് രേഖപ്പെടുത്തിയിരുന്നു. ഇന്ത്യൻ രൂപയുടെ വിനിമയ നിരക്കിൽ ദുർബലാവസ്ഥയാണ് രാജ്യത്ത് വില ഉയരാനുള്ള പ്രധാന കാരണം.യു.എസ് ഫെഡറൽ റിസർവ് ചെയർമാൻ ജെറോം പവലിന്റെ ബ്രൂക്കിംഗ് ഇൻസ്റ്റിറ്റ്യൂഷനിൽ നടത്തിയ പ്രസംഗം സ്വർണത്തിന് 1780 ഡോളർ കടക്കാൻ വഴിയൊരുക്കിയിരുന്നു.

ചൈനയിൽ കോവിഡ് ലോക്ക്ഡൗൺ ലഘൂകരിച്ചതും സ്വർണ വിലയിൽ വർധനവുണ്ടാക്കി. പണപ്പെരുപ്പത്തെക്കുറിച്ചുള്ള ആശങ്കകൾ ഇപ്പോഴും നിലനിൽക്കുന്നതിനാൽ സ്വർണ വില കൂടാനുള്ള സാധ്യതകളാണ് പ്രവചിക്കുന്നത്.