സ്വർണവില വീണ്ടും കുറഞ്ഞു

തിരുവനന്തപുരം: സംസ്ഥാനത്ത്​ സ്വർണവില വീണ്ടും കുറഞ്ഞു. ഗ്രാമിന്​ 30 രൂപ കുറഞ്ഞ്​ 4695 രൂപയാണ്​ ഇന്നത്തെ വില. പവന്​ 240 രൂപ കുറഞ്ഞ്​ 37,560 രൂപയിലെത്തി.

ആഗോളവിപണിയിലും സ്വർണ വില ഇടിയുകയാണ്​. ഡോളർ കരുത്താർജിക്കുന്നത്​ വില ഇടിയുന്നതിനുള്ള ഒരു കാരണമാണ്​. യു.എസിൽ സാമ്പത്തിക പാക്കേജ്​ പ്രഖ്യാപിക്കുമെന്ന പ്രതീക്ഷ നിക്ഷേപകരെ ഓഹരിയിലുൾപ്പടെ പണമിറക്കാൻ പ്രേരിപ്പിക്കുന്നുണ്ട്​. ഇതും വില കുറയുന്നതിനുള്ള പ്രധാനകാരണമായി വിലയിരുത്തുന്നു. കോവിഡ്​ വാക്​സിൻ സംബന്ധിച്ച പ്രഖ്യാപനങ്ങളും സ്വർണവിലയെ സ്വാധീനിക്കുന്നുണ്ട്​.

കോവിഡും തുടർന്നുണ്ടായ സാമ്പത്തിക പ്രതിസന്ധികളും കാരണം 25 ശതമാനമാണ്​ ഈ വർഷം സ്വ​ർണവില ഉയർന്നത്​. ആഗോള സമ്പദ്​വ്യവസ്ഥക്ക്​ പ്രതീക്ഷിച്ച ആഘാതമുണ്ടായിട്ടില്ലെന്ന ഐ.എം.എഫ്​ പ്രഖ്യാപനവും ചൈനയെ പോലുള്ള രാജ്യങ്ങൾ വേഗത്തിൽ പ്രതിസന്ധിയിൽ നിന്ന്​ കര കയറുന്നതും സ്വർണവിലയെ വരുംനാളുകളിലും കാര്യമായി സ്വാധീനിക്കാനിടയുണ്ട്​.