സ്വർണവില വീണ്ടും കുറഞ്ഞു

കൊച്ചി: സംസ്ഥാനത്ത് സ്വർണവില വീണ്ടും കുറഞ്ഞു. പവന്റെ വിലയിൽ 200 രൂപയുടെ കുറവാണ് ഉണ്ടായത്. 37,920 രൂപയിൽ നിന്നും 37,720 രൂപയായാണ് സ്വർണവില കുറഞ്ഞത്. ഗ്രാമിന്റെ വില 25 രൂപ കുറഞ്ഞ് 4715ലെത്തി. കഴിഞ്ഞ ദിവസവും സ്വർണവിലയിൽ കുറവ് രേഖപ്പെടുത്തിയിരുന്നു.

അതേസമയം, മൾട്ടി ​കമ്മോഡിറ്റി എക്സ്ചേഞ്ചിൽ സ്വർണത്തിന്റെ ഭാവി വിലകൾ ഉയർന്നു. 138 രൂപ നേട്ടത്തോടെ 10 ഗ്രാം സ്വർണത്തിന്റെ വില 50,345 രൂപയായി. ആഗോളതലത്തിൽ ഒരു മാസത്തിനിടെയിലെ കുറഞ്ഞ നിരക്കിൽ നിന്നും സ്വർണത്തിന് നേരിയ മുന്നേറ്റമുണ്ടായി.

യു.എസ് കേന്ദ്രബാങ്കായ ഫെഡ് റിസർവ് പലിശനിരക്കുകൾ പ്രഖ്യാപിക്കാനിരിക്കുന്നതാണ് സ്വർണവിലയെ സ്വാധീനിക്കുന്നത്. പണപ്പെരുപ്പം ഉയരുന്ന സാഹചര്യത്തിൽ കേന്ദ്രബാങ്ക് എന്ത് നിലപാടെടുക്കുമെന്നത് നിർണായകമാണ്. സ്​പോട്ട് ഗോൾഡിന്റെ വിലയും 0.1 ശതമാനം ഉയർന്നു.