തെരഞ്ഞെടുപ്പ്​ വരുന്നു; നികുതി കുറച്ച്​ എണ്ണവില പിടിച്ചു നിർത്താൻ കേന്ദ്രം

ന്യൂഡൽഹി: അഞ്ച്​ സംസ്ഥാനങ്ങളിൽ നിയമസഭ തെരഞ്ഞെടുപ്പ്​ നടക്കാനിരിക്കെ നികുതി കുറച്ച്​ എണ്ണവില പിടിച്ചു നിർത്താൻ നീക്കവുമായി കേന്ദ്രസർക്കാർ. ആഗോള വിപണിയിൽ ക്രൂഡ്​ ഓയിലിന്‍റെ വില ഉയരുന്നതും കേന്ദ്രത്തെ ഇത്തരമൊരു തീരുമാനമെടുക്കാൻ പ്രേരിപ്പിക്കുന്നുവെന്നാണ്​ വിവരം.

പശ്​ചിമബംഗാൾ, അസം, കേരളം, തമിഴ്​നാട്​, പുതുച്ചേരി തുടങ്ങിയ സ്ഥലങ്ങളിലാണ്​ തെരഞ്ഞെടുപ്പ്​ നടക്കുന്നത്​. ഈ സംസ്ഥാനങ്ങളിലെല്ലാം ഇന്ധന വില വർധനവ്​ പാർട്ടികൾ പ്രധാനപ്പെട്ട തെരഞ്ഞെടുപ്പ്​ പ്രചാരണ വിഷയമാക്കുന്നുണ്ട്​. ഇത്​ ബി.ജെ.പിയെ പ്രതിരോധത്തിലാക്കുകയും ചെയ്യുന്നു. ഈയൊരു സാഹചര്യത്തിലാണ്​ നികുതി കുറച്ച്​ തൽക്കാലത്തേക്ക്​ ജനരോഷത്തിൽ നിന്ന്​ രക്ഷപ്പെടാനുള്ള ശ്രമം.

ഫെബ്രുവരി 26 മുതൽ തെരഞ്ഞെടുപ്പ്​ പെരുമാറ്റചട്ടം നിലവിലുണ്ട്​. എങ്കിലും ഇന്ധനനികുതി കുറക്കുന്നത്​ ദേശീയവിഷയമായതിനാൽ പെരുമാറ്റച്ചട്ടം ബാധകമാവില്ലെന്നാണ്​ വിലയിരുത്തൽ. നിലവിൽ രാജ്യത്ത്​ വിൽക്കുന്ന പെട്രോളിന്‍റെ റീടെയിൽ വിലയുടെ 60 ശതമാനം നികുതികളാണ്​. ഡീസലിലേക്ക്​ എത്തു​േമ്പാൾ വിലയിൽ നികുതികളുടെ സ്വാധീനം 54 ശതമാനമാണ്​.