എൻ.എസ്​.ഇ മുൻ ഓപ്പറേറ്റിങ്​ ഓഫീസർ ആനന്ദ്​ സുബ്രമണ്യം അറസ്റ്റിൽ

ന്യൂഡൽഹി: എൻ.എസ്​.ഇ മുൻ ഓപ്പറേറ്റിങ് ഓഫീസർ ആനന്ദ്​ സുബ്രമണ്യത്തെ സി.ബി.ഐ അറസ്റ്റ്​ ചെയ്തു. ചെന്നൈയിലെത്തി വ്യാഴാഴ്ച അർധ രാത്രിയോടെയാണ്​ സുബ്രമണ്യത്തെ സി.ബി.ഐ അറസ്റ്റ്​ ചെയ്തത്​. പിന്നീട്​ ഇയാളെ ഡൽഹിയിലുള്ള സി.ബി.ഐ ആസ്ഥാനത്തെത്തിച്ചു. ഇന്ന്​ കോടതിയിൽ ഹാജരാക്കി ആനന്ദ്​ സുബ്രമണ്യത്തെ കസ്റ്റഡിയിൽ വാങ്ങും. കോ-ലോക്കേഷൻ അഴിമതിയുമായി ബന്ധപ്പെട്ടാണ്​ അറസ്റ്റ്​.

കേസിലെ സി.ബി.ഐ അന്വേഷണത്തോടെ സുബ്രമണ്യം സഹകരിച്ചിരുന്നില്ല. എൻ.എസ്​.ഇ മുൻ സി.ഇ.ഒയായ ചിത്ര രാമകൃഷ്ണയും വിവാദ യോഗിയുമായി നടന്ന ഇമെയിൽ സന്ദേശങ്ങൾ സംബന്ധിച്ചുള്ള കേസിലും ആനന്ദ്​ സുബ്രമണ്യം ആരോപണവിധേയനായിരുന്നു. 2018​ലാണ്​ സെബി ഇതുമായി ബന്ധപ്പെട്ട്​ കേസെടുത്തത്​. എൻ.എസ്​.ഇയുടെ സെർവറുകളിൽ ചില ബ്രോക്കർമാർക്ക്​ മാത്രം പ്രത്യേക പരിഗണന ലഭിക്കുന്നുവെന്ന പരാതിയിലായിരുന്നു കേസ്​. ഈ കേസിന്‍റെ അന്വേഷണത്തിനിടെ എൻ.എസ്​.ഇ മുൻ സി.ഇ.ഒ ചിത്ര രാമകൃഷ്ണയും വിവാദ യോഗിയും തമ്മിലുള്ള ഇമെയിൽ സന്ദേശങ്ങൾ പുറത്ത്​ വന്നത്​.

നേരത്തെ ചിത്ര രാമകൃഷ്ണയേയും സി.ബി.ഐ ചോദ്യം ചെയ്തിരുന്നു. 12 മണിക്കൂറോളമാണ്​ ചിത്രയെ സി.ബി.ഐ ചോദ്യം ചെയ്തത്​. രഹസ്യവിവരങ്ങൾ ചോർത്തിയതിന്​ സെബി ചിത്രക്ക്​ മൂന്ന്​ കോടി രൂപ പിഴയും ചുമത്തിയിരുന്നു. 2014 മുതൽ 2016 വരെയുള്ള കാലയളവിൽ എൻ.എസ്​.ഇയുടെ പല തീരുമാനങ്ങളെടുത്തത്​ വിവാദ യോഗിയുടെ നിർദേശപ്രകാരമായിരുന്നുവെന്ന്​ ചിത്ര മൊഴി നൽകിയിരുന്നു.