റഷ്യയിൽ നിന്നുള്ള രണ്ട്​ ശതകോടീശ്വരുടെ ഓഹരികൾ മരവിപ്പിച്ച്​ ലെറ്റർ വൺ

ലണ്ടൻ: റഷ്യയിൽ നിന്നുള്ള രണ്ട്​ ശതകോടീശ്വരെ വിലക്കി ലെറ്റർവൺ. മിഖായേൽ ഫ്രെഡ്​മാൻ, പീറ്റർ അവേൻ എന്നിവരുടെ 22 ബില്യൺ ഡോളർ മൂല്യം വരുന്ന ഓഹരികളാണ്​ മരവിപ്പിച്ചത്​. ലെറ്റർവണ്ണിൽ റഷ്യൻ വ്യവസായികൾക്ക്​ 50 ശതമാനത്തിൽ താഴെ മാത്രം ഓഹരികളാണുള്ളതെന്നും കമ്പനി അറിയിച്ചു. ഇരുവരുടേയും കമ്പനിയിലെ ഇടപെടലുകളേയും വിലക്കിയിട്ടുണ്ട്​.

മിഖായേൽ ഫ്രൈഡ്​മാൻ പീറ്റർ അവേൻ എന്നിവർ കമ്പനിയിൽ ഇടപെടില്ലെന്ന്​ ഉറപ്പാക്കിയിട്ടുണ്ടെന്ന്​ ചെയർമാനും മുൻ തൊഴിൽ മന്ത്രിയുമായ ലോർഡ്​ ഡേവിസ്​ പറഞ്ഞു. ഇരുവരുടേയും ഓഹരികൾ മരവിപ്പിച്ചതോടെ ഇവർക്ക്​ ഡിവിഡന്‍റും മറ്റ്​ ആനുകൂല്യങ്ങളും ലഭിക്കില്ല. ബിസിനസിനെ സംബന്ധിക്കുന്ന നിർണായക വിവരങ്ങൾ ഇവർക്ക്​ ലഭ്യമാവില്ലെന്നും ഡേവിസ്​ വ്യക്​തമാക്കി.

വിലക്കേർപ്പെടുത്തിയവർക്കല്ല കമ്പനിയുടെ നിയന്ത്രണം. ഇ.യു നിരോധനം നിലനിൽക്കുന്നതിലാണ്​ ഇരു വ്യവസായികളു​ടേയും ഇടപെടലുകൾക്ക്​ നിയന്ത്രണം കൊണ്ടുവന്നതെന്നും ഡേവിസ്​ പറഞ്ഞു. ലെറ്റർവൺ ഓഫീസുകളിൽ കടക്കുന്നതിനും തൊഴിലാളികളുമായി സംസാരിക്കുന്നതിനും ഇരുവർക്കും വിലക്കുണ്ട്​. നേരത്തെ പല കോർപ്പറേറ്റ്​ കമ്പനികളും റഷ്യയിലുള്ള വ്യാപാരത്തിന്​ നിയന്ത്രണം ഏർപ്പെടുത്തിയിരുന്നു. ഇതിന്​ പിന്നാലെയാണ്​ യു.കെ കേന്ദ്രീകരിച്ച്​ പ്രവർത്തിക്കുന്ന റഷ്യൻ വ്യവസാിയികൾക്ക്​ നിയന്ത്രണം വരുന്നത്​.