പരമ്പരാഗത തൊഴിലാളികളുടെ നൈപുണ്യ വികസനത്തിന് പി.എം വികാസ് പദ്ധതി

ന്യൂഡൽഹി: വിവിധ പരമ്പരാഗത- കരകൗശല വിദഗ്ധ തൊഴിലുകളിൽ ഏർപ്പെടുന്നവർക്ക് പി.എം വികാസ് (പ്രധാന മന്ത്രി വിശ്വകർമ്മ കൗഷൽ സമ്മാൻ എന്ന പേരിൽ സഹായ പദ്ധതി പ്രഖ്യാപിച്ച് കേന്ദ്ര സർക്കാർ ബജറ്റ്. സ്വർണപ്പണിക്കാർ ഉൾപ്പെടുന്ന പരമ്പരാഗത മേഖലയിലെ വിവിധ തൊഴിലുകളിൽ ഏർപ്പെട്ടിരിക്കുന്ന വിദഗ്ധർക്കാണ് പദ്ധതി പ്രയോജനപ്പെടുക.

മൈക്രോ-സ്മോൾ- മീഡിയം എന്‍റർപ്രൈസസ് ശൃംഖലയുമായി സംയോജിപ്പിച്ച് ഉൽപന്നങ്ങളുടെ ഗുണനിലവാരം, അളവ്, എത്തിച്ചേരൽ എന്നിവ മെച്ചപ്പെടുത്താൻ ഈ വിഭാഗത്തിലെ തൊഴിലാളികളെ പ്രാപ്തരാക്കും.

രാജ്യത്തെ വിവിധ സംസ്ഥാനങ്ങളിൽ വ്യാപിച്ച് കിടക്കുന്ന പരമ്പരാഗത തൊഴിൽ വിഭാഗമാണ് വിശ്വകർമ്മ സമൂഹം. ഇവരുടെ നൈപുണ്യ വികസനമാണ് പദ്ധതിയിലൂടെ കേന്ദ്ര സർക്കാർ ലക്ഷ്യമിടുന്നത്. ആശാരി, സ്വർണപ്പണിക്കാർ അടക്കം അറുപതോളം ജനവിഭാഗമാണ് വിശ്വകർമ്മ സമൂഹത്തിൽ ഉൾപ്പെടുന്നത്.