ഉത്തേജക പാക്കേജിനായി ജനങ്ങളുടെ നികുതി പണത്തിൽ നിന്ന്​ ഒരു രൂപ പോലും എടുക്കില്ലെന്ന്​ ധനമന്ത്രി

ന്യൂഡൽഹി: കോവിഡിൽ തകർന്ന സമ്പദ്​വ്യവസ്ഥയെ കരകയറ്റുന്നതിനായി പ്രഖ്യാപിച്ച ഉത്തേജക പാക്കേജുകൾക്കായി ജനങ്ങളുടെ നികുതി പണത്തിൽ നിന്ന്​ ഒരു രൂപ പോലും എടുക്കില്ലെന്ന്​ ധനമന്ത്രി നിർമല സീതാരാമൻ. കടമെടുത്തും സർക്കാറിന്‍റെ മറ്റ്​ വരുമാന മാർഗങ്ങൾ ഉപയോഗിച്ചുമാവും ഉത്തേജക പാക്കേജുകൾക്ക്​ പണം സ്വരൂപീക്കുക​െയന്നും ധനമന്ത്രി വ്യക്​തമാക്കി.

നികുതിദായകർ ഉത്തേജക പാക്കേജിന്​ പണം നൽകുമെന്ന്​ പ്രതീക്ഷിക്കുന്നില്ല. ഒരു രൂപ​ പോലും അവർ തരേണ്ടതില്ല. പാക്കേജിനുള്ള മുഴുവൻ പണവും കടമെടുത്തും മറ്റ്​ വരുമാന മാർഗങ്ങളിലൂടെയും കണ്ടെത്തുമെന്ന്​ നിർമല സീതാരാമൻ വ്യക്​തമാക്കി. ഇന്ത്യൻ വുമൺ പ്രസ്​ കോർപസ്​ സംഘടിപ്പിച്ച പരിപാടിയിൽ സംബന്ധിച്ച്​ സംസാരിക്കുകയായിരുന്നു ധനമന്ത്രി.

സമ്പദ്​വ്യവസ്ഥയെ പ്രതിസന്ധിയിൽ നിന്ന്​ കരകയറ്റാൻ 27.1 ലക്ഷം കോടി മൂല്യം വരുന്ന ആത്​മനിർഭർ പാക്കേജുകളാണ്​ കേന്ദ്രർസർക്കാർ പ്രഖ്യാപിച്ചത്​. ജി.ഡി.പിയുടെ 13 ശതമാനത്തേക്കാൾ കൂടുതലായിരുന്നു പാക്കേജ്​.