കോവിഡിൽ വിറച്ച്​ വിപണിയും; റിലയൻസിനുണ്ടായത്​ കനത്ത നഷ്​ടം

മുംബൈ: കോവിഡിന്‍റെ രണ്ടാം തരംഗം ഇന്ത്യയിൽ രൂക്ഷമാകുന്നത്​ ഓഹരി വിപണിയിലും പ്രതിസന്ധിയാകുന്നു. ബോംബെ സൂചിക സെൻസെക്​സ്​ 740.19 പോയിന്‍റ്​ നഷ്​ടത്തോടെ 48,440ലാണ്​ വ്യാപാരം അവസാനിപ്പിച്ചത്​. ദേശീയ സൂചിക നിഫ്​റ്റി 224.50 പോയിന്‍റ്​ നഷ്​ടത്തോടെ 14,324.90ലും ക്ലോസ്​ ചെയ്​തു. കഴിഞ്ഞ ദിവസവും വിപണികൾ നഷ്​ടത്തോടെയാണ്​ വ്യാപാരം അവസാനിപ്പിച്ചത്​.

റിലയൻസ്​, ഹിന്ദുസ്ഥാൻ യുണിലിവർ, ഐ.ടി.സി, ഇൻഫോസിസ്​, മാരുതി തുടങ്ങിയ കമ്പനികളാണ്​ കനത്ത നഷ്​ടം നേരിട്ടത്​. എൽ & ടി, എച്ച്​.ഡി.എഫ്​.സി, എച്ച്​.ഡി.എഫ്​.സി ബാങ്ക്​, ഐ.സി.ഐ.സി.ഐ എന്നിവയാണ്​ നേട്ടത്തിൽ വ്യാപാരം അവസാനിപ്പിച്ചത്​.

റിലയൻസിന്‍റെ നഷ്​ടം മാത്രം സെൻസെക്​സിനെ 101 പോയിന്‍റ്​ പിന്നോട്ടടിച്ചു. ​സെൻസെക്​സിൽ 534 ഓഹരികൾ മാത്രമാണ്​ നേട്ടമുണ്ടാക്കിയത്​. 2,280 എണ്ണവും നഷ്​ടത്തിലായിരുന്നു വ്യാപാരം. ദേശീയ സൂചികയിൽ 250 ഓഹരികൾ നേട്ടമുണ്ടാക്കിയപ്പോൾ 1,631 എണ്ണം നഷ്​ടത്തിലായി.

വിൽപന സമ്മർദമാണ്​ വിപണിയെ കടുത്ത പ്രതിസന്ധിയിലേക്ക്​ നയിച്ചത്​. ഇന്ത്യയിൽ വീണ്ടും കോവിഡ്​ വർധിക്കുന്നതാണ്​ വിപണിയിലും തിരിച്ചടിയുണ്ടാക്കുന്നത്​. രാജ്യത്ത്​ കോവിഡ്​ രോഗികളുടെ എണ്ണം 50,000 കടന്നിരുന്നു.