വീണ്ടും ഞെട്ടിച്ച്​ റിലയൻസും അംബാനിയും; ഇനി ലോകത്തെ രണ്ടാമത്തെ വലിയ ബ്രാൻഡ്​​

മുംബൈ: ലോകത്തെ രണ്ടാമത്തെ വലിയ ബ്രാന്‍ഡായി തെരഞ്ഞെടുക്കപ്പെട്ട് മുകേഷ്​ അംബാനിയുടെ​ റിലയന്‍സ് ഇന്‍ഡസ്ട്രീസ്. ആഗോള ബ്രാന്‍ഡ് ട്രാന്‍സ്ഫര്‍മേഷന്‍ കമ്പനിയായ ഫ്യൂച്ചര്‍ ബ്രാന്‍ഡി​െൻറ 2020ലെ സൂചികയിലാണ്​ ആപ്പിളിന് തൊട്ടു പിന്നിലായി റിലയൻസ്​ സ്ഥാനം പിടിച്ചത്​. സാംസങ്ങാണ്​ പട്ടികയില്‍ മൂന്നാം സ്ഥാനത്ത്. ഫ്യൂച്ചര്‍ ബ്രാന്‍ഡി​െൻറ പട്ടികയിലേക്ക്​ ആദ്യമായാണ് റിലയന്‍സ് ഇൻഡസ്​ട്രീസ്​ എത്തുന്നത്​ എന്ന പ്രത്യേകതയുമുണ്ട്​.

റിലയൻസ്​ ഇൻഡസ്​ട്രീസ്​ എല്ലാ മേലയിലും മികവ്​ പുലർത്തിയതായി തങ്ങളുടെ സൂചിക പുറത്തിറക്കിക്കൊണ്ട്​ ഫ്യൂച്ചർബ്രാൻഡ്​ പറഞ്ഞു. ഇന്ത്യയിലെ ഏറ്റവും ബഹുമാനിക്കപ്പെടുന്നതും ലാഭമേറിയതുമായ കമ്പനി, നൂതനമായ സംരംഭങ്ങള്‍, വിശാലമായ ഉപഭോക്തൃ സേവനം എന്നിവയും റിലയന്‍സി​െൻറ കരുത്താണെന്ന് ഫ്യൂച്ചര്‍ ബ്രാന്‍ഡ് റിപ്പോര്‍ട്ടില്‍ പറയുന്നു. ഇന്ത്യക്കാര്‍ക്ക് എല്ലാ ഉത്പന്നങ്ങളും സേവനങ്ങളും ലഭിക്കുന്ന 'വണ്‍ സ്റ്റോപ്പ് ഷോപ്പ്' ആയി റിലയന്‍സിനെ ഉയര്‍ത്താനുള്ള ചെയര്‍മാന്‍ മുകേഷ് അംബാനിയുടെ നടപടികളാണ് റിലയൻസി​െൻറ മുന്നേറ്റത്തിന്​ പിന്നിലെന്നും ഫ്യൂച്ചര്‍ ബ്രാന്‍ഡ് കൂട്ടിച്ചേർത്തു.

ഈ വര്‍ഷം 15 പുതിയ ബ്രാന്‍ഡുകളാണ് ഫ്യൂച്ചർബ്രാൻഡി​െൻറ പട്ടികയിൽ ഇടംപിടിച്ചത്​. റിലയന്‍സ് ഇന്‍ഡസ്ട്രീസ് ഉള്‍പ്പെടെ അതില്‍ ഏഴും ആദ്യ 20 സ്ഥാനങ്ങളില്‍ ഇടം നേടിയിട്ടുണ്ട്​. ലോകത്തെ ഏറ്റവും മൂല്യമേറിയ കമ്പനിയായ സൗദി ആരാംകോ ബ്രാന്‍ഡ് മുന്‍ഗണനാ പട്ടികയില്‍ 91-ാം സ്ഥാനത്താണ്. എന്‍വിഡിയ, മൗതായി, നൈക്കി, മൈക്രോസോഫ്റ്റ്, എ.എസ്.എം.എല്‍., പേപാല്‍, നെറ്റ്ഫ്‌ളിക്സ് എന്നിവയാണ് യഥാക്രമം നാലു മുതല്‍ പത്തുവരെ സ്ഥാനങ്ങളിലുള്ളത്.