യു.എസ്​ ചരിത്രത്തിലെ ഏറ്റവും വലിയ നിക്ഷേപ തട്ടിപ്പ്​ നടത്തിയ ബെർനാഡ്​ മാഡോഫ്​ അന്തരിച്ചു

വാഷിങ്​ടൺ: അമേരിക്കൻ ചരിത്രത്തിലെ ഏറ്റവും വലിയ സാമ്പത്തിക തട്ടിപ്പ്​ നടത്തിയ ബെർനാഡ്​ മാഡോഫ്​ അന്തരിച്ചു. ഫെഡറൽ മെഡിക്കൽ സെന്‍ററിൽ ചികിത്സയിലിരിക്കെ 82ാം വയസിലാണ്​ അന്ത്യം സംഭവിച്ചത്​.

ഗുരുതരമായ വൃക്ക രോഗം ബാധിച്ചതിനെ തുടർന്ന്​ മാഡോഫ് ദീർഘകാലമായി​ ചികിത്സയിലായിരുന്നു. ഒരു തവണ നാസ്​ഡാക്കിന്‍റെ ചെയർമാനായ മാഡോഫ്​ വാൾസ്​ട്രീറ്റിന്‍റെ ചരിത്രത്തിലെ ഏറ്റവും വലിയ തട്ടിപ്പുകളിലൊന്നാണ്​ നടത്തിയത്​.

1990കൾ മുതലാണ്​ വൻ തുക തിരികെ നൽകുമെന്ന്​ പ്രഖ്യാപിച്ച്​ മാഡോഫ്​ നിക്ഷേപം സ്വീകരിക്കാൻ തുടങ്ങിയത്​. 1990, 1998 തുടങ്ങിയ വർഷങ്ങളിൽ മാഡോഫിന്‍റെ നിക്ഷേപ പദ്ധതികളിലേക്ക്​ വൻ തോതിൽ പണമൊഴുകി. 2001ലെ വേൾഡ്​ ട്രേഡ്​ സെന്‍റർ ആക്രമണ സമയത്തും ജനങ്ങൾ വലിയ രീതിയിൽ മ​ാഡോഫിനെ വിശ്വസിച്ച്​ പണമിറക്കി. എന്നാൽ, 2008ൽ മാഡോഫിന്‍റെ നിക്ഷേപ പദ്ധതികളുടെ പൊള്ളത്തരം വെളിവായി.

ഓഹരി വിപണിയിൽ നിക്ഷേപിക്കുമെന്ന്​ അവകാശപ്പെട്ട്​ സ്വീകരിച്ച പണമെല്ലാം എവിടെയും നിക്ഷേപിച്ചി​ട്ടില്ലെന്ന്​ വെളിപ്പെടുകയും തുടർന്ന്​ മാഡോഫ്​ തന്നെ കുറ്റസമ്മതം നടത്തുകയും ചെയ്​തു. 65 ബില്യൺ ഡോളറിന്‍റെ തട്ടിപ്പാണ്​ മാഡോഫ്​ നടത്തിയതെന്നാണ്​ സൂചന. 150 വർഷത്തെ ജയിൽശിക്ഷയാണ്​ മാഡോഫിന്​ കോടതി നൽകിയത്​.