‘മതിയായ ജോലിയില്ല’; സൊമാറ്റോ 13 ശതമാനം ജീവനക്കാരെ പിരിച്ചുവിടും

ന്യുഡൽഹി: കോവിഡ്​ കാരണം വരുമാനവും ജോലിയും കുറഞ്ഞതിൻെറ അടിസ്​ഥാനത്തിൽ ഓൺലൈൻ ഫുഡ്​​ ഡെലിവറി ഭീമൻമാരായ സൊമാറ്റോയിൽ പിരിച്ചുവിടലും സാലറി കട്ടും പ്രഖ്യാപിച്ചു. ​വെള്ളിയാഴ്​ചയാണ്​ 13ശതമാനം ജീവനക്കാരെ പിരിച്ചുവിടുകയും 50 ശതമാനം ജീവനക്കാർക്ക്​ ജൂൺ മുതൽ സാലറി കട്ട്​ ഏർപെടുത്തുകയും ചെയ്​തത്​. 

വിവിധ കാരണങ്ങളാൽ കഴിഞ്ഞ ഒന്ന്​ രണ്ട്​ മാസങ്ങളിൽ കമ്പനിയുടെ ബിസിനസ്​ മോശമാണ്​. അവയിൽ ചിലത് ഭാവിയിലും നിലനിൽക്കാനും സാധ്യതയുള്ളതിനാലാണ്​​ ​പിരിച്ചുവിടലെന്ന്​ വെള്ളിയാഴ്​ച കമ്പനിയുടെ സ്​ഥാപകനും സി.ഇ.ഒയുമായ ദീപീന്ദർ ഗോയൽ ജീവനക്കാരെ ബ്ലോഗ്​ പോസ്​റ്റിലൂടെ  അറിയിച്ചു. തങ്ങളെക്കൊണ്ടാകും വിധം തൊഴിലാളികളെ സാമ്പത്തികമായും മാനസികമായും പിന്തുണക്കുമെന്നും ഗോയൽ പറഞ്ഞു. പുതിയ ജോലി കണ്ടെത്താൻ ആവശ്യമായ സഹായങ്ങൾ ചെയ്യാൻ സൊമാറ്റോ സഹസ്​ഥാപകനും ചീഫ്​ ഓപറേറ്റിങ്​ ഓഫിസറുമായ ഗൗരവ്​ ഗുപ്​തയും ഫുഡ്​ ഡെലിവറി സി.ഇ.ഒ മോഹിത്​ ഗുപ്​തയും  അടുത്ത ദിവസങ്ങളിൽ പിരിച്ചുവിടപ്പെട്ട ജീവനക്കാരുമായി ബന്ധപ്പെടും. അടുത്ത ദിവസങ്ങളിൽ വിഡിയോ കോൾ വഴിയാകും കമ്പനി മേധാവികൾ തൊഴിലാളികളുമായി സംവദിക്കുക. 

കമ്പനിയിൽ ജോലിയില്ലാതായ ആളുകൾക്ക്​ അടുത്ത ആറുമാസത്തേക്ക്​ 50 ശതമാനം ശമ്പളം നൽകും. എന്നാൽ കഴിയുന്ന അത്രയും വേഗത്തിൽ പുതിയ ജോലി കണ്ടെത്താൻ ഇവർ തങ്ങളുടെ സമയവും ഊർജ്ജവും ചെലവഴിക്കണമെന്നും സി.ഇ.ഒ പറഞ്ഞു. രാജ്യത്താകമാനം 4000ത്തിലധികം ജീവനക്കാരാണ്​ സൊമാറ്റോക്കുള്ളത്​. 

ശമ്പളം കുറഞ്ഞ ജീവനക്കാർക്ക്​ കുറഞ്ഞ ശതമാനം വേതനം മാത്രമാകും നഷ്​ടമാകുക. ഉയർന്ന ശമ്പളമുള്ളവർക്കാണ്​ 50 ശതമാനം സാലറി കട്ടുള്ളത്​. സാലറി കട്ടിന്​ സന്നദ്ധത അറിയിച്ച ജീവനക്കാരെ പുതിയ സാലറി കട്ട്​ വ്യവസ്​ഥകൾ ബാധിക്കില്ലെന്ന്​ സി.ഇ.ഒ പറഞ്ഞു. 

Latest Video