സാമ്പത്തികമാന്ദ്യം: മോദിയുടെ ഗുജറാത്തിൽ വജ്ര തൊഴിലാളികൾ ആത്​മഹത്യയുടെ വക്കിൽ

ഡയമണ്ട്​ സിറ്റി എന്ന വിളിപേരുള്ള സൂറത്ത്​ ഇന്ത്യയിലെ വജ്ര വ്യവസായത്തിൻെറ പ്രധാന കേന്ദ്രങ്ങളിലൊന്നാണ്​. വജ ്രം മുറിക്കുന്നതിനും പോളീഷ്​ ചെയ്യുന്നതിനുമുള്ള പ്രധാന കേന്ദ്രവും ഇതു തന്നെ. ഏകദേശം ഒന്നര ദശലക്ഷം ആളുകൾ സൂറ ത്തിലെ വജ്ര വ്യവസായത്തിൽ തൊഴിൽ ചെയ്​തിരുന്നുവെന്നാണ്​ കണക്കാക്കുന്നത്​. എന്നാൽ, ഇപ്പോൾ സൂറത്തിന്​ പഴയ വജ്ര തിളക്കമില്ല. ഇന്ത്യയെ പിടച്ചുലച്ച സാമ്പത്തിക മാന്ദ്യം സൂറത്തിനെയും ബാധിച്ചിരിക്കുന്നു. വജ്ര വ്യവസായ മേഖലയിൽ ഏകദേശം 20,000 പേർക്ക്​ തൊഴിൽ നഷ്​ടമായെന്നാണ്​ കണക്കാക്കുന്നത്​. തൊഴിൽ നഷ്​ടം മൂലം കഴിഞ്ഞ രണ്ട്​ മാസത്തിനിടെ അഞ്ച്​ തൊഴിലാളികളാണ്​ ആത്​മഹത്യ ചെയ്​തത്​. ഇക്കുറി ദീപാവലിക്ക്​ ബോണസ്​ പോലും ഇല്ലാത്ത സ്ഥിതിയിലാണ്​ നഗരത്തിലെ വജ്രമേഖലയിൽ പണിയെടുക്കുന്നവർ.

വരുമാനം 40,000ത്തിൽ നിന്ന്​ 10,000ലേക്ക്​...
പ്രതിമാസം 40,000 രൂപ വരെ സൂറത്തിലെ വജ്രം പോളീഷ്​ ചെയ്യുന്നവർക്ക്​ വരുമാനം ലഭിച്ചിരുന്നു. എന്നാൽ, ഇപ്പോൾ ഇതിൽ വലിയ ഇടിവുണ്ടാകുന്നുവെന്നാണ്​ കണക്കുകൾ വ്യക്​തമാക്കുന്നത്​. പലർക്കും 8,000 മുതൽ 10,000 രൂപ വരെയാണ്​ നിലവിൽ ലഭിക്കുന്നത്​. ഇതിന്​ പുറമേ പലർക്കും തൊഴിൽ ലഭിക്കാത്ത സാഹചര്യവും ഉണ്ട്​. പഴയ പോലെ കച്ചവടം നടക്കാതായതോടെ വ്യാപാര സ്ഥാപനങ്ങൾ ആളുകളെ പിരിച്ച്​ വിടാനും തുടങ്ങി. ഇത്തരത്തിൽ തൊഴിൽ നഷ്​ടമായ ജിതേന്ദ്ര പവാസിയ കുടുംബം പുലർത്താൻ ഇപ്പോൾ ചായ കച്ചവടം ചെയ്യുകയാണ്​. മുമ്പ്​ ലഭിച്ചിരുന്ന വരുമാനവുമായി താരതമ്യം ചെയ്യു​േമ്പാൾ ചായ കച്ചവടം നഷ്​ടമാണ്​. എങ്കിലും കുടുംബത്തിലെ ദൈനംദിന ചെലവുകൾ നടത്താൻ തനിക്കിതല്ലാതെ വെറെ വഴിയില്ലെന്ന്​ പവാസിയ പറയുന്നു. ഇന്ത്യൻ സമ്പദ്​വ്യവസ്ഥയുടെ പുതിയ മുഖമാണ്​ പവാസിയയെ പോലുള്ളവരിലൂടെ തെളിയുന്നത്​.

വ്യാപര യുദ്ധവും ജി.എസ്​.ടിയും തിരിച്ചടിയായി
ചൈന-യു.എസ്​ വ്യാപാര യുദ്ധവും ജി.എസ്​.ടിയുമാണ്​ വജ്ര വ്യവസായ മേഖലയുടെ തകർച്ചക്കുള്ള കാരണമെന്നാണ്​ വ്യാപാരികൾ പറയുന്നത്​. സൂറത്തിൽ നിർമ്മിക്കുന്ന വജ്രത്തിൻെറ 95 ശതമാനവും കയറ്റുമതി ചെയ്യുകയാണ്​. വജ്രത്തിൻെറ പ്രധാന വിപണി ചൈനയാണ്​. ഇന്ത്യയിൽ നിന്ന്​ കയറ്റുമതി ചെയ്യുന്ന വജ്രം മൂല്യവർധിത ഉൽപന്നങ്ങളാക്കി ചൈന മറ്റ്​ രാജ്യങ്ങളിൽ വിൽക്കുകയാണ്​ ചെയ്യുന്നത്​. വ്യാപാര യുദ്ധം തുടങ്ങിയതോടെ ചൈനയിലേക്കുള്ള വജ്ര കയറ്റുമതിയിൽ വൻ ഇടിവുണ്ടായി. ഇത്​ മേഖലയിൽ കടുത്ത പ്രതിസന്ധിയുണ്ടാക്കിയതായി പറയുന്നു.

ഇതിന്​ പുറമേ വജ്ര വ്യാപാരികൾക്ക്​ വലിയ പ്രതിസന്ധിയുണ്ടാക്കുന്നത്​ ജി.എസ്​.ടിയാണ്​. വജ്ര നിർമാണത്തിൽ തൊഴിലിന്​ 5 ശതമാനമാണ്​വ്യാപാരികൾ ജി.എസ്​.ടി നൽകുന്നത്​. ഇതിന്​ ഇൻപുട്ട്​ ടാക്​സ്​ ക്രെഡിറ്റ്​ ലഭിക്കുന്നുമില്ല. ഈ രീതിയിൽ ഏകദേശം 150 മുതൽ 200 കോടി രൂപ വരെ വജ്ര വ്യാപാരികൾ ​സർക്കാർ ഖജനാവിന്​ നൽകുന്നുണ്ട്​. തൊഴിലിന്​ നൽകുന്ന ജി.എസ്​.ടിയിൽ ഇൻപുട്ട്​ ടാക്​സ്​ ​ക്രെഡിറ്റ്​ നൽകണമെന്ന്​ ആവശ്യപ്പെട്ട്​ വജ്ര വ്യാപാരികൾ ധനമന്ത്രി നിർമലാ സീതാരാമനുമായി കൂടികാഴ്​ച നടത്തിയിരുന്നു. എന്നാൽ, ഇനിയും ഇക്കാര്യത്തിൽ അനുകൂല തീരുമാനം ഉണ്ടായിട്ടില്ല.