യു.എസ്​ വ്യോമാക്രമണം: ഓഹരി വിപണികളും ഇടിഞ്ഞു

മുംബൈ: യു.എസ്​ വ്യോമാക്രമണത്തിൽ ഇറാൻ കമാൻഡർ കൊല്ലപ്പെട്ടതിനെ തുടർന്ന്​ ഇന്ത്യൻ ഓഹരി വിപണിയിലും ഇടിവ്​. നിഫ്​റ്റി 0.35 ശതമാനം നഷ്​ടത്തോടെയാണ്​ വ്യാപാരം തുടങ്ങിയത്​. സെൻസെക്​സിലും 0.28 ശതമാനം നഷ്​ടം രേഖപ്പെടുത്തി.

ഓയിൽ റിഫൈനറി, റീടെയിൽ, ടെലികോം തുടങ്ങിയ കമ്പനികളുടെ ഓഹരികളാണ്​ ഇടിഞ്ഞത്​. റിലയൻസ്​ ഇൻഡസ്​ട്രീസ്​ 0.7 ശതമാനം നഷ്​ടം രേഖപ്പെടുത്തി. ഒ.എൻ.ജി.സി, ഗെയിൽ തുടങ്ങിയ പൊതുമേഖല എണ്ണകമ്പനികളുടെ ഒാഹരികൾ 2.4 ശതമാനം ഇടിഞ്ഞു. വിവിധ വിമാന കമ്പനികളുടെ ഓഹരികളും താഴ്​ന്നിട്ടുണ്ട്​.

സെപ്​റ്റംബർ 17ന്​ ശേഷമുള്ള ഏറ്റവും ഉയർന്ന​ നിലയിലാണ്​ എണ്ണവിലയിപ്പോൾ. 2.88 ശതമാനം വർധനയോടെ ബാരലിന്​ 68.16 ഡോളറാണ്​ അന്താരാഷ്​ട്ര വിപണിയിലെ എണ്ണവില. ഡോളറിനെതിരെ രൂപയുടെ മൂല്യവും ഇടിഞ്ഞു. 0.26 ശതമാനം ഇടിഞ്ഞ്​ 71.55 രൂപയാണ്​ ഡോളറിനെതിരെ രൂപയുടെ വിനിമയ മൂല്യം.