റെക്കോഡ്​ തകർച്ച: രൂപയുടെ മൂല്യം ഡോളറിനെതിരെ 70 കടന്നു

മുംബൈ: ചരിത്രത്തിലെ റെക്കോഡ്​ ഇടിവിലേക്കു കൂപ്പുകുത്തി ഇന്ത്യൻ രൂപ. ചൊവ്വാഴ്​ച വ്യാപാരം തുടങ്ങിയപ്പോൾ ഡോളറിനെതിരെ രൂപയുടെ  മൂല്യം 70 കടക്കുകയായിരുന്നു. ആദ്യ മണിക്കൂറുകളിൽ ഡോളറിനെതിരെ  രൂപയുടെ വിനിമയ മൂല്യം 70.1  ൽ എത്തി. 69.98ൽ ആണ് ഇപ്പോൾ വ്യാപാരം നടക്കുന്നത്. 

തിങ്കളാഴ്​ച റെക്കോർഡ് താഴ്ചയിലാണു രൂപ ഡോളറിനെതിരെ വ്യാപാരം അവസാനിപ്പിച്ചത്. 69.91 ആയിരുന്നു കഴിഞ്ഞ ദിവസത്തെ വിനിമയ നിരക്ക്​. 

തുർക്കി കറൻസിയായ ലിറയുടെ ഇടിവാണ്​ വികസ്വര രാജ്യങ്ങളിലെ കറൻസികളുടെ മൂല്യം താഴുന്നതിന്​ കാരണമായത്​. തുടർച്ചയായ ഇടിവുകളോടെ രൂപ ഏഷ്യയിലും ഏറ്റവും ദുർബലമായ കറൻസികളുടെ പട്ടികയിലാണ്. ഏഴു ശതമാനത്തിനും മുകളിലാണ് ഈ വർഷത്തെ ഇടിവ്. 

അതേ സമയം, ഇന്ത്യൻ ഒാഹരി വിപണികൾ നേട്ടത്തോടെയാണ്​ വ്യാപാരം നടക്കുന്നത്​. ബോംബെ സൂചിക സെൻസെക്​സ് 184.93  പോയിൻറ്​ നേട്ടത്തിലാണ്​ വ്യാപാരം തുടങ്ങിയത്​. ദേശീയ സൂചിക നിഫ്​റ്റിയും നേട്ടത്തിലാണ്.