പ്രളയക്കെടുതി: റിലയൻസ്​ 71 കോടിയുടെ സഹായം നൽകും

ന്യൂഡൽഹി: പ്രളയക്കെടുതിയിൽ വലയുന്ന കേരളത്തിന്​ റിലയൻസ്​ 71 കോടിയുടെ സഹായം നൽകും. നീത അംബാനിയുടെ നേതൃത്വത്തിലുള്ള റിലയൻസ്​ ഫൗണ്ടേഷനാണ്​ കേരളത്തിന്​ സഹായമെത്തിക്കുക. ഇതിൽ 21 കോടി രൂപ മുഖ്യമന്ത്രിയുടെ ദുരിതാശ്വാസനിധിയിലേക്ക്​ സംഭാവന ചെയ്യും. 50 കോടി രൂപയുടെ ഉൽപന്നങ്ങൾ വിവിധ ദുരിതാശ്വാസ ക്യാമ്പുകളിൽ വിതരണം ചെയ്യുമെന്നാണ്​ റിലയൻസ്​ അറിയിച്ചിരിക്കുന്നത്​.

160 സർക്കാർ ദുരിതാശ്വാസ ക്യാമ്പുകളിലായി 50,000 പേർക്ക്​ ഭക്ഷണവും അവശ്യവസ്​തുക്കളും വിതരണം ചെയ്യുമെന്നാണ്​ റിലയൻസ്​ ഫൗണ്ടേഷ​​​​െൻറ അറിയിപ്പ്​​. സംസ്ഥാനത്തിന്​ സഹായവുമായുളള പ്രത്യേക വിമാനം മഹാരാഷ്​ട്രയിൽ നിന്ന്​ കേരളത്തിലെത്തുമെന്നും റിലയൻസ്​ പുറത്തിറക്കിയ പത്രകുറിപ്പിൽ വ്യക്​തമാക്കുന്നു. ഇതിന്​ പുറമേ പ്രളയത്തിന്​ ശേഷമുള്ള കേരളത്തി​​​​െൻറ പുനർനിർമാണത്തിന്​ കമ്പനിയുടെ സഹായവുമുണ്ടാകും.

​പ്രളയം മൂലം ദുരിതത്തിലായ കേരളത്തെ സഹായിക്കാൻ  നിരവധി കമ്പനികൾ നേരത്തെ രംഗത്തെത്തിയിരുന്നു. ഇവർക്ക്​ പിന്നാലെയാണ്​ റിലയൻസും ​ സഹായം നൽകുന്നത്​.