നോട്ട്​ നിരോധനം: പരാജയം സമ്മതിച്ച്​ മോദിയുടെ മുൻ സാമ്പത്തിക ഉപദേഷ്​ടാവ്

ന്യൂഡൽഹി: നോട്ട്​ നിരോധനം സമ്പദ്​വ്യവസ്ഥയിൽ കടുത്ത ആഘാതമുണ്ടാക്കിയെന്ന്​ മോദിയുടെ മുൻ സാമ്പത്തിക ഉപദേഷ്​ടാവ്​ അരവിന്ദ്​ സുബ്രമണ്യൻ. സമ്പദ്​വ്യവസ്ഥയുടെ വളർച്ചാ നിരക്ക്​ 6.8 ശതമാനത്തിലേക്ക്​ ഇടിയാൻ നോട്ട്​ നിരോധനം കാരണ​മായെന്നും അദ്ദേഹം പറഞ്ഞു. തീരുമാനം നടപ്പിലാക്കുന്നതിന്​ മുമ്പ്​ എട്ട്​ ശതമാനത്തിൽ വളർന്നിരുന്ന സമ്പദ്​വ്യവസ്ഥയാണ്​ 6.8ലേക്ക്​ കൂപ്പുകുത്തിയത്​.

നോട്ട്​ നിരോധനം നടപ്പിലാക്കി രണ്ട്​ വർഷങ്ങൾക്ക്​ ശേഷമാണ്​ ഇക്കാര്യത്തിൽ അരവിന്ദ്​ സുബ്രമണ്യൻ മൗനം വെടിഞ്ഞത്​. നോട്ട്​ നിരോധനം സമ്പദ്​വ്യവസ്ഥയിൽ ഉണ്ടാക്കുന്ന പ്രശ്​നങ്ങളെ കുറിച്ച്​ പ്രായോഗികമായ ചർച്ചകളൊന്നും നടന്നില്ല. അസംഘടിത മേഖലയിൽ തീരുമാനം ഉണ്ടാക്കുന്ന ആഘാതങ്ങൾ പരിഗണിച്ചില്ലെന്നും അരവിന്ദ്​ വ്യക്​തമാക്കി. തീരുമാനം നടപ്പിലാക്കുന്നതിന്​ മുമ്പ്​ മുഖ്യസാമ്പത്തിക ഉപദേഷ്​ടാവുമായി കൂടി​യാലോചനകൾ നടന്നിട്ടില്ലെന്നും അദ്ദേഹം വെളിപ്പെടുത്തി.

ജി.ഡി.പി വളർച്ച നിരക്ക്​ കുറയുന്നതിന്​ നോട്ട്​ നിരോധനം കാരണമായി. അതേസമയം, ഇത്​ മാത്രമാണ്​ ജി.ഡി.പി കുറയുന്നതിനുള്ള കാരണമെന്ന്​ പറയാൻ സാധിക്കില്ല. എണ്ണവില ഉയർന്നതും പലിശനിരക്ക്​ കൂടിയതും സമ്പദ്​വ്യവസ്ഥയെയും ജി.ഡി.പിയെയും ബാധിച്ചിട്ടുണ്ട്​. എങ്കിലും വളർച്ചാ നിരക്ക്​ കുറയാനുള്ള പ്രധാന കാരണങ്ങളിലൊന്ന്​ നോട്ട്​ നിരോധനമായിരുന്നു. അസംഘടിത മേഖലയിൽ തീരുമാനം സൃഷ്​ടിച്ച ആഘാതങ്ങളെ കുറിച്ച്​ കൃതമായ പഠനങ്ങളൊന്നും നടന്നിട്ടില്ലെന്നും അദ്ദേഹം വ്യക്​തമാക്കി.