നീരവ്​ മോദിയുടെ 637 കോടി രൂപയുടെ സ്വത്തുക്കൾ കണ്ടുകെട്ടി

ന്യൂഡൽഹി: പി.എൻ.ബി ബാങ്ക്​ തട്ടിപ്പ്​ നടത്തി മുങ്ങിയ വജ്രവ്യാപാരി നീരവ്​ മോദിയുടെ 637 കോടി രൂപ വിലവരുന്ന സ്വത്തുക്കൾ കണ്ടുകെട്ടി. ന്യൂയോർക്കിലെ ആഡംബര അപ്പാർട്ട്​മ​​െൻറും വജ്രം പതിച്ച മോതിരങ്ങളും സ്വർണ വളകളുമുൾപ്പെടെയുള്ള സ്വത്തുക്കളാണ്​ എൻഫോഴ്​സ്​മ​െൻറ്​ ഡയറക്​ടറേറ്റ്​ പിടിച്ചെടുത്തത്​. നീരവ്​ മോദിക്ക്​ ഇന്ത്യയിലും യു.കെയിലും ന്യൂയോർക്കിലുമായാണ്​ ഫ്ലാറ്റുകളും ജ്വല്ലറികളും ബാങ്ക്​ ബാലൻസുമടക്കുള്ള സ്വത്തുക്കൾ ഉള്ളത്​.

കള്ളപ്പണം വെളുപ്പിക്കൽ നിരോധന നിയമപ്രകാരം അന്വേഷണ ഏജൻസി പുറപ്പെടുവിച്ച​ അഞ്ച്​ വ്യത്യസ്​ത ഉത്തരവുകൾ പ്രകാരമാണ്​ സ്വത്തുക്കൾ കണ്ടുകെട്ടിയത്​. വിദേശത്തെ സ്വത്തുക്കൾ ഇന്ത്യൻ ഏജൻസികൾ കണ്ടുകെട്ടിയ സംഭവങ്ങൾ വളരെ കുറച്ചു മാത്രമേ നടന്നിട്ടുള്ളു. മാർച്ചിൽ നീരവ്​ മോദിയുടെ 36 കോടി രൂപ വിലവരുന്ന സ്വത്തുക്കൾ എൻഫോഴ്​സ്​മ​​െൻറ്​ ഡയറക്​ടറേറ്റ്​ ക​ണ്ടുകെട്ടിയിരുന്നു.

പഞ്ചാബ്​ നാഷണൽ ബാങ്കിൽ നിന്ന്​ 12,600 കോടി രൂപയുടെ തട്ടിപ്പ്​ നടത്തിയ കേസിൽ പ്രധാന പ്രതിയാണ്​ നീരവ്​ മോദി. അമ്മാവൻ മെഹുൽ ചോക്​സിയും കേസിലെ പ്രധാന പ്രതിയാണ്​. ഇതേ കേസിലെ മറ്റൊരു പ്രതിയായ ആദിത്യ നാനാവതിക്കെതിരെ ഇൻറർപോളി​​​െൻറ റെഡ്​ കോർണർ നോട്ടീസും പുറപ്പെടുവിച്ചിട്ടുണ്ട്​.