വരാനിരിക്കുന്നത്​ വൻ പ്രതിസന്ധി; ഇന്ത്യയുടെ വളർച്ചാ നിരക്ക്​ 2.5 ശതമാനമാകുമെന്ന്​ മുഡീസ്​

ന്യൂഡൽഹി: കോവിഡ്​ 19 വൈറസ്​ ബാധയെ തുടർന്ന്​ ഇന്ത്യ വൻ പ്രതിസന്ധി അഭിമുഖീകരിക്കുമെന്ന്​ മുഡീസ്​ പ്രവചനം. 2020ൽ ഇന്ത്യയുടെ വളർച്ച നിരക്ക്​ 2.5 ശതമാനമായി കുറയുമെന്നാണ്​ റേറ്റിങ്​ ഏജൻസി വ്യക്​തമാക്കുന്നത്​. ആഴ്​ചകൾക്ക്​ മുമ്പ്​ ഇന്ത്യൻ സമ്പദ്​വ്യവസ്ഥ 5.3 ശതമാനം നിരക്കിൽ വളരുമെന്നായിരുന്നു മുഡീസ്​ പ്രവചനം. ഇതാണ്​ ഏജൻസി താഴ്​ത്തിയിരിക്കുന്നത്​.

ഇന്ത്യൻ സമ്പദ്​വ്യവസ്ഥയിൽ വായ്​പകളുടെ തോതിൽ വൻ കുറവ്​ രേഖപ്പെടുത്തുകയാണ്​. ബാങ്കുകളിലേയും ബാങ്കിങ്​ ഇതര ധനകാര്യ സ്ഥാപനങ്ങളിലേയും പണ​പ്രതിസന്ധിയാണ്​ പ്രശ്​നങ്ങൾക്ക്​ കാരണം. ഇതിന്​ പുറമേ കോവിഡ്​ 19 കൂടി എത്തിയതോടെ സമ്പദ്​വ്യവസ്ഥ സമാനതകളില്ലാത്ത പ്രതിസന്ധി നേരിടുമെന്നാണ്​ മൂഡീസ്​ വ്യക്​തമാക്കുന്നത്​.

ലോക്​ഡൗണിന്​ മുമ്പ്​ റേറ്റിങ്​ ഏജൻസിയായ എസ്​&പി ഗ്ലോബൽ ഇന്ത്യയുടെ വളർച്ചാ നിരക്ക്​ 5.2 ശതമാനമായി കുറച്ചിരുന്നു. ലോക്​ഡൗണിന്​ ശേഷം എസ്​&പി ഇത്​ വീണ്ടും കുറക്കുമെന്നാണ്​ സൂചന. മുഡീസ്​ ചൈനയുടെ വളർച്ചാ നിരക്കും 3.3 ശതമാനമായി കുറച്ചിട്ടുണ്ട്​.