ഖത്തർ എയർവേയ്​സുമായി​ സഹകരിക്കുന്നു; ഇൻഡിഗോയുടെ ഓഹരി വില ഉയർന്നു

മുംബൈ: ഇന്ത്യൻ ബജറ്റ്​ വിമാന കമ്പനിയായ ഇൻഡിഗോയും ഖത്തർ എയർവേയ്​സും തമ്മിൽ സഹകരിക്കുന്നു. നവംബർ ഏഴിന്​ പുതിയ പദ്ധതി അവതരിപ്പിക്കുമെന്നാണ്​ കമ്പനികൾ അറിയിച്ചിരിക്കുന്നത്​. കൂടുതൽ അന്താരാഷ്​ട്ര റൂട്ടുകളിൽ സഹകരണം വർധിപ ്പിക്കാൻ ഒരുങ്ങുന്നതായി ഇൻഡിഗോ സി.ഇ.ഒ റോ​ണോജോയ്​ ദത്തയും ഖത്തർ എയർവേയ്​സ് സി.ഇ.ഒ​ അക്​ബർ അൽ ബക്കറും വ്യക്​തമാക്കി.

ഇരു കമ്പനികളും സഹകരിക്കുന്നുവെന്ന റിപ്പോർട്ടുകൾ പുറത്ത്​ വന്നതിന്​ പിന്നാലെ ബോംബെ സ്​റ്റോക്ക്​ എക്​സ്​ചേഞ്ചിൽ ഇൻഡിഗോയുടെ ഓഹരി വില ഉയർന്നു. 4.64 ശതമാനം നേട്ടത്തോടെ ഇൻഡിഗോയുടെ ഓഹരി വില 1502.70 രൂപയിലെത്തി.

ഇൻഡിഗോയിൽ ഞങ്ങൾക്ക്​ താൽപര്യമുണ്ട്​. എന്നാൽ, കമ്പനിയുടെ ഇക്വിറ്റി ഷെയറുകൾ ഖത്തർ എയർവേയ്​സ്​ വാങ്ങില്ലെന്നും മറ്റ്​ തരത്തിലുള്ള സഹകരണമാവും ഇരു കമ്പനികളും ചേർന്ന്​ നടത്തുകയെന്ന്​ ഖത്തർ എയർവേയ്​സ്​ സി.ഇ.ഒ പറഞ്ഞു. ഇന്ത്യൻ ആഭ്യന്തര സർവീസുകളിൽ 50 ശതമാനം വിഹിതത്തോടെ ഇൻഡിഗോയാണ്​ ഒന്നാം സ്ഥാനത്ത്​.