ലോകത്തുള്ള എല്ലാവർക്കും വേണ്ടി കോവിഡ്​ വാക്​സിൻ നിർമിക്കാൻ ഇന്ത്യക്ക്​ കഴിയുമെന്ന്​ ബിൽ ഗേറ്റ്​സ്​

വാഷിങ്​ടൺ: സ്വന്തം രാജ്യത്തെ ജനങ്ങൾക്ക്​ മാത്രമല്ല, ലോകത്തുള്ള എല്ലാവർക്കും വേണ്ട കോവിഡ്​ 19 വാക്​സിൻ നിർമിക്കാൻ ഇന്ത്യൻ ഫാർമസ്യൂട്ടിക്കൽ ഇൻഡസ്​ട്രിക്ക്​ കഴിയുമെന്ന്​ മൈക്രോസോഫ്റ്റ് സഹസ്ഥാപകന്‍ ബിൽ ഗേറ്റ്​സ്​. ഔഷധ നിര്‍മ്മാണ രംഗത്ത് ഇന്ത്യ കൈവരിച്ച നേട്ടങ്ങള്‍ പ്രശംസനീയമാണെന്നും ബിൽഗേറ്റ്​സ്​ പറഞ്ഞു. കോവിഡ്​ 19: ‘ഇന്ത്യാസ് വാര്‍ എഗെയ്ന്‍സ്റ്റ് ദ വൈറസ്’ എന്ന ഡോക്യുമ​െൻററിയിലാണ്​ അദ്ദേഹം ഇന്ത്യയെ അഭിനന്ദിച്ച്​ രംഗത്തെത്തിയത്​. ഡിസ്കവറി പ്ലസ് ചാനലിൽ വ്യാഴാഴ്ച വൈകുന്നേരം ഡോക്യുമ​െൻററി സംപ്രേഷണം ചെയ്യും.

ഇന്ത്യയുടെ മെഡിക്കല്‍ രംഗം മികച്ചതാണ്​. കൊറോണ വാക്​സിൻ നിർമിക്കാനുള്ള കഴിവ്​ ഇവിടുത്തെ മരുന്ന്​ നിർമാതാക്കൾക്കുണ്ട്​. ആ കഴിവുപയോഗിച്ച്​ പല മറ്റ്​ രോഗങ്ങൾക്കുള്ള ഒൗഷധങ്ങളും അവർ നിർമിക്കുന്നുണ്ട്​. മറ്റെവിടത്തേക്കാളും കൂടുതല്‍  വാക്സിനുകള്‍ ഇന്ത്യയില്‍ നിര്‍മ്മിക്കുന്നുണ്ടെന്നും അദ്ദേഹം പറഞ്ഞു. 

പുനെയിലെ സെറം ഇന്‍സ്റ്റിറ്റ്യൂട്ട് അടക്കം നിരവധി മരുന്ന്​ ഉൽപ്പാദകൾ ഇന്ത്യയിലുണ്ട്​. ബയോ ഇ, ഭാരത് ബയോട്ടെക്ക് എന്നീ പ്രമുഖ മരുന്ന് കമ്പനികളെയും ബില്‍ ഗേറ്റ്സ് പരാമര്‍ശിച്ചു. വലിയ ഒരു രാജ്യം എന്ന നിലയിലും കൂടിയ ജനസംഖ്യയും ഇന്ത്യക്ക്​ വലിയ വെല്ലുവിളിയാണ്​ സൃഷ്​ടിക്കുന്നത്​. എന്നാല്‍ അത്തരം സാഹചര്യങ്ങളിലെല്ലാം രാജ്യം ശക്തമായി നേരിട്ടിട്ടുണ്ടെന്നും അദ്ദേഹം കൂട്ടിച്ചേർത്തു.