സമ്പദ്​വ്യവസ്ഥയിൽ പ്രതിസന്ധി; ആദായ നികുതി പരിധി ഉയർത്തിയേക്കും

17:07 PM
20/06/2019
Income Tax Returns

ന്യൂഡൽഹി: ഇന്ത്യൻ സമ്പദ്​വ്യവസ്ഥ കടുത്ത പ്രതിസന്ധി നേരിടുന്ന സാഹചര്യത്തിൽ ​​രണ്ടാം മോദി സർക്കാറിൻെറ ആദ്യ ബജറ്റിൽ ആദായനികുതി പരിധി ഉയർത്തിയേക്കും. നിലവിലുള്ള 2.5 ലക്ഷത്തിൽ നിന്ന്​ 3 ലക്ഷമായി ആദായ നികുതി പരിധി ഉയർത്താനുള്ള ആലോചനകളാണ്​ ധനമന്ത്രാലയം നടത്തുന്നതെന്ന്​ ദേശീയ മാധ്യമങ്ങൾ റിപ്പോർട്ട്​ ചെയ്യുന്നു. ഇതിനൊപ്പം സെക്ഷൻ 80 സി പ്രകാരം നൽകുന്ന ആദായനികുതി കിഴിവിൻെറ പരിധിയും ഉയർത്തും.

സെക്ഷൻ 80 സി പ്രകാരം നിലവിൽ ആദായ നികുതിയിൽ ലഭിക്കുന്ന കിഴിവ്​ 1.5 ലക്ഷം രൂപയാണ്​​. സമ്പദ്​വ്യവസ്ഥയിൽ വളർച്ചാ നിരക്ക്​ കുറഞ്ഞ സാഹചര്യത്തിലാണ്​ പുതിയ നീക്കം. അഞ്ച്​ വർഷത്തിനിടയിലെ കുറഞ്ഞ നിരക്കായ 5.8 ശതമാനത്തിലേക്ക്​ രാജ്യത്തെ സാമ്പത്തിക വളർച്ചാ നിരക്ക്​ എത്തിയതിന്​ പിന്നാലെയാണ്​ തിരക്കിട്ട നീക്കങ്ങൾ. 

സമ്പദ്​വ്യവസ്ഥയിൽ ഉപഭോഗത്തിലുണ്ടായ കുറവ്​ കേന്ദ്രസർക്കാറിനെ കടുത്ത പ്രതിസന്ധിയിലാക്കുന്നുണ്ട്​. ഇത്​ മറികടക്കാനുള്ള നീക്കങ്ങൾക്കാണ്​ സർക്കാർ പ്രഥമ പരിഗണന നൽകുന്നത്​. ദ്വൈമാസ ധനഅവലോകന യോഗത്തിൽ തുടർച്ചയായ മൂന്നാം തവണയും ആർ.ബി.ഐ പലിശ നിരക്കുകൾ കുറച്ചതും ഉപഭോഗം വർധിപ്പിക്കുക എന്ന ലക്ഷ്യം മുൻനിർത്തിയാണ്​.

Loading...
COMMENTS