‘ഫിനേബ്ലർ’: ഡോ. ബി.ആർ. ഷെട്ടിയുടെ നേതൃത്വത്തിൽ പുതിയ ഫിനാൻഷ്യൽ ഹോൾഡിങ് കമ്പനി  

ദുബൈ: യു.എ.ഇ ആസ്ഥാനമായി പ്രവർത്തിക്കുന്ന പ്രമുഖ സംരംഭകനും ജീവകാരുണ്യ പ്രവർത്തകനുമായ ഡോ. ബി.ആർ. ഷെട്ടി ത​​െൻറ ഉടമസ്ഥതയിലെ എല്ലാ ധനവിനിമയ സ്ഥാപനങ്ങളെയും ഉൾക്കൊള്ളിച്ച്​ ‘ഫിനേബ്ലർ’ എന്ന ഹോൾഡിങ് കമ്പനി രൂപവത്​കരിക്കുന്നു. യു.കെയിൽ റജിസ്​റ്റർ ചെയ്​ത്​ യു.എ.ഇ ആസ്​ഥാനമായി നിലവിൽ വരുന്ന ‘ഫിനേബ്ലർ’ ഹോൾഡിങ്​സിനു കീഴിലാണ്​ യു.എ.ഇ എക്സ്ചേഞ്ച്, ട്രാവലക്സ്, എക്സ്പ്രസ് മണി തുടങ്ങിയ സാമ്പത്തിക സ്​ഥാപനങ്ങളെല്ലാം പ്രവർത്തിക്കുക. 

നൂതന സാങ്കേതിക വിദ്യയുടെ എല്ലാ സാധ്യതകളും സൗകര്യങ്ങളും ഉപയോഗപ്പെടുത്തി ഉപയോക്താക്കൾക്ക് ഏറ്റവും മികച്ച സേവനങ്ങളും ആനുകൂല്യങ്ങളും നൽകുവാനാണ്​ ലക്ഷ്യമിടുന്നതെന്ന്​ ‘ഫിനേബ്ലർ’ പ്രഖ്യാപന ചടങ്ങിൽ ചെയർമാൻ ഡോ. ബി.ആർ. ഷെട്ടി വ്യക്​തമാക്കി.  ഗവേഷണത്തിനും സാങ്കേതികവത്കരണത്തിനും വലിയ നിക്ഷേപം നടത്തി  തങ്ങളുടെ ബ്രാൻഡുകളിൽ വിപ്ലവകരമായ സേവന സൗകര്യങ്ങൾ ആവിഷ്കരിക്കുമെന്നും നാല്പതിലേറെ വർഷങ്ങളായി ഉപഭോക്​തൃസമൂഹം പുലർത്തുന്ന വിശ്വാസവും  അർപ്പണബോധമുള്ള പതിനെട്ടായിരത്തിലേറെ ജീവനക്കാരുമാണ്​ ഇൗ മാറ്റത്തിനുള്ള ഉൗർജമെന്നും അദ്ദേഹം കൂട്ടിച്ചേർത്തു. 
യു.എ.ഇ ഒഴികെയുള്ള സ്ഥലങ്ങളിലെ യു.എ.ഇ എക്സ്ചേഞ്ച് സ്ഥാപനങ്ങൾ ‘യൂണിമണി’ എന്ന പുതിയ നാമത്തിൽ  അവതരിപ്പിക്കും.
നിലവിൽ പ്രതിവർഷം 150 ദശലക്ഷം ഇടപാടുകളാണ്​ ഇൗ സ്​ഥാപനങ്ങൾ മുഖേന നടക്കുന്നത്​.  45 രാജ്യങ്ങളിൽ നേരിട്ടും 165 രാജ്യങ്ങളിൽ ശ​ൃംഖലകൾ വഴിയും സേവനം നൽകുന്നു. 

വ്യവസായത്തിലെ പുതു പ്രവണതകളും സാധ്യതകളും കണ്ടെത്തി നൂതന പദ്ധതികൾ ആവിഷ്​കരിക്കുന്നതിന്​ ഇന്നവേഷൻ ഹബുകൾക്ക്​ തുടക്കമിടുമെന്ന്​ പ്രഖ്യാപന ചടങ്ങിൽ  ‘ഫിനേബ്ലർ’ എക്സിക്യൂട്ടീവ് ഡയറക്ടർമാരായ ബിനയ് ഷെട്ടി, പ്രമോദ്​ മങ്ങാട്ട്​ എന്നിവർ വ്യക്​തമാക്കി.