ഇരുമ്പ് കമ്പിയിലും വ്യാജന്‍?

സംസ്ഥാനത്ത് വിറ്റഴിക്കുന്ന ഇരുമ്പ് കമ്പിയിലും വ്യാജനുണ്ടോ?. വ്യാജ സ്റ്റീല്‍ വിറ്റഴിക്കുന്നെന്ന പരാതിയുമായി കമ്പനികള്‍തന്നെയാണ് പൊലീസിനെ സമീപിച്ചത്. പ്രമുഖ കമ്പനികളുടെ ബ്രാന്‍റ് നെയിമില്‍ വ്യാജ സ്റ്റീല്‍ വില്‍ക്കുന്നുവെന്നാണ് പരാതി. തങ്ങളുടെ ബ്രാന്‍ഡ് നാമം ദുരുപയോഗപ്പെടുത്തി വ്യാജ ഉല്‍പന്നങ്ങള്‍ സംസ്ഥാനത്തെ ചില മേഖലകളില്‍ എത്തുന്നതായി കണ്ടത്തെിയെന്ന് പരാതിയുമായി എത്തിയവരില്‍ പ്രമുഖര്‍ കമ്പി നിര്‍മാതാക്കളായ ജെ.എസ്.ഡബ്ളിയു ഗ്രൂപ്പാണ്. വിവിധ ജില്ലകളില്‍ വ്യാജ സ്റ്റീല്‍ ഉല്‍പന്നങ്ങള്‍ വില്‍പന നടത്തുന്നത് തടയണമെന്നാവശ്യപ്പെട്ട് ഇവര്‍ പൊലീസിനും വാണിജ്യ വകുപ്പിനും മറ്റും പരാതി നല്‍കി. 
ചൈന ഇറക്കുമതിയും വ്യാപകമാണ്. ചൈനയില്‍നിന്ന് കമ്പി ഇറക്കുമതി ചെയ്യുന്നത് തങ്ങളുടെ വ്യാപാരത്തെ പ്രതികൂലമായി ബാധിക്കുന്നുവെന്ന പരാതിയുമായി ഇന്ത്യന്‍ കമ്പി നിര്‍മാതാക്കള്‍ കേന്ദ്ര വാണിജ്യ മന്ത്രാലയത്തെ സമീപിച്ചിരുന്നു. സമ്മര്‍ദഫലമായി ഇറക്കുമതി ചെയ്യുന്ന ഇരുമ്പ് കമ്പികള്‍ക്ക് ‘ആന്‍റി ഡമ്പിങ് ചുങ്കം’ ഏര്‍പ്പെടുത്തകയും ചെയ്തു. ടണ്ണിന് 499 മുതല്‍ 538 രൂപവരെയാണ് ധനമന്ത്രാലയം നികുതി ചുമത്തിയിരിക്കുന്നത്. ആറുമാസത്തേക്കാണ് പ്രാബല്യത്തിലുണ്ടാവുക.