റിലയൻസ്​-സൗദി ആരാംകോ ഓഹരി ഇടപാട്​ തടയണമെന്ന്​ കേന്ദ്രം

09:47 AM
21/12/2019
mukesh-ambani-23

ന്യൂഡൽഹി: റിലയൻസ്​ ഇൻഡസ്​ട്രീസും ബ്രിട്ടീഷ്​ ഗ്യാസും അവരുടെ സ്വത്തുക്കൾ വെളിപ്പെടുത്തണമെന്ന്​ ഡൽഹി ഹൈകോടതി. ഇരു കമ്പനികളും സ്വത്തുക്കൾ വിൽക്കുന്നത്​ തടയണമെന്ന കേന്ദ്രസർക്കാറിൻെറ ഹരജിയിലാണ്​ ഹൈകോടതി നടപടി. റിലയൻസ്​-സൗദി ആരാംകോ ഇടപാടിൻെറ വിവരങ്ങളും വെളിപ്പെടുത്തണമെന്ന്​ കോടതി ആവശ്യപ്പെട്ടിട്ടുണ്ട്​. 

സെപ്​തംബറിലാണ്​ കേന്ദ്രസർക്കാർ ഇതുമായി ബന്ധപ്പെട്ട ഹരജി സമർപ്പിച്ചത്​. പാനാ-മുക്​ത-താപ്തി ഉൽപാദന കരാർ പ്രകാരം ലഭിക്കാനുള്ള 4.5 ബില്യൺ ഡോളറിൻെറ തർക്കപരിഹാരം തുക നൽകുന്നതിൽ റിലയൻസും ബ്രിട്ടീഷ്​ ഗ്യാസും വീഴ്​ച വരുത്തിയെന്ന്​ ആരോപിച്ചാണ്​ ഹരജി. 1994ൽ ഏർപ്പെട്ട കരാറിൻെറ കാലാവധി ശനിയാഴ്​ചയാണ്​ അവസാനിക്കുന്നത്​.കമ്പനിയുടെ സ്വത്തുക്കൾ സംബന്ധിച്ച്​ സത്യവാങ്​മൂലം നൽകാൻ കോടതി റിലയൻസിനോട്​ ബ്രിട്ടീഷ്​ ഗ്യാസിനോടും ആവശ്യപ്പെട്ടു. കേസ്​ ഫെബ്രുവരി ആറിന്​ വീണ്ടും പരിഗണിക്കും. ഇരു കമ്പനികളും ആവശ്യമായ സെക്യൂരിറ്റി നൽകണമെന്നാണ്​ കേന്ദ്രസർക്കാർ ആവശ്യം. 

നിലവിൽ 2.88 ലക്ഷം കോടിയുടെ ബാധ്യതയാണ്​ റിലയൻസിനുള്ളത്​. ഇത്​ കുറക്കുന്നതിനായാണ്​ കമ്പനി ഓഹരി വിൽപന നടത്തുന്നത്​. 2010 മുതൽ റിലയൻസിനെതിരായി കേന്ദ്രസർക്കാർ കേസ്​ നടത്തുന്നുണ്ട്​. 2016ൽ പലിശയുൾപ്പടെ 4.5 ബില്യൺ ഡോളർ കേന്ദ്രസർക്കാറിന്​ നൽകാൻ ഉത്തരവായി. പാനാ-മുക്​ത പ്രൊജക്​ടിൽ റിലയൻസിനും ബ്രിട്ടീഷ്​ ഗ്യാസിനുമൊപ്പം ഒ.എൻ.ജി.സിയും പങ്കാളിയാണ്​. ഇരു കമ്പനികളും പ്രൊജക്​ടിൽ നിന്ന്​ പിന്മാറു​േമ്പാൾ നൽകേണ്ട നഷ്​ടപരിഹാരത്തിലാണ്​ കേസ്​ നടക്കുന്നത്​.

Loading...
COMMENTS