മീ ടു: ബിന്നി ബൻസാലിനോട്​ യുവതി മാപ്പ്​ പറഞ്ഞു

ബംഗളൂരു: മീ ടു വിവാദത്തിൽ ബിന്നി ബൻസാലിനെതിരെ ആരോപണം ഉന്നയിച്ച യുവതി മാപ്പ്​ പറഞ്ഞു. യുവതിക്കെതിരെ ബിന്നി ബൻസാൽ പൊലീസിൽ പരാതി നൽകിയതിന്​ പിന്നാലെയാണ്​ മാപ്പപേക്ഷ. ബിന്നിയുടെ പരാതിയിൽ പൊലീസ്​ മൊഴിയെടുക്കാൻ വിളിച്ചപ്പോൾ ആരോപണങ്ങളിൽ താൻ മാപ്പപേക്ഷിക്കുകയാണെന്ന്​ യുവതി അറിയിക്കുകയായിരുന്നു. തുടർന്ന്​ ബിന്നി പരാതി പിൻവലിച്ചു. ഇക്കണോമിക്​സ ടൈംസാണ്​ വാർത്ത റിപ്പോർട്ട്​ ചെയ്​തത്​.

മീ ടു ആരോപണങ്ങൾ ഉയർന്നതിനെ തുടർന്ന്​ ബിന്നി ബൻസാലിനെ ഫ്ലിപ്​കാർട്ടിൽ നിന്നും കമ്പനിയുടെ ഉടമസ്ഥരായ വാൾമാർട്ട്​ പുറത്താക്കിയിരുന്നു. യുവതിക്കെതിരെ പരാതി നൽകുമെന്ന്​ ബിന്നി ബൻസാൽ വ്യക്​തമാക്കിയിരുന്നു. ഫ്ലിപ്​കാർട്ടിൽ ജോലി ചെയ്​തിരുന്ന സമയത്ത്​ ബിന്നിയിൽ നിന്ന്​ മോശം പെരുമാറ്റം ഉണ്ടായെന്നാണ്​ യുവതിയുടെ ആരോപണം.

അതേസമയം, ആരോപണങ്ങളെ കുറിച്ച്​ വാൾമാർട്ട്​ അന്വേഷിച്ചിരുന്നു. ഇതിൽ ഇരുവരും തമ്മിൽ പരസ്​പരം സമ്മതപ്രകാരമുള്ള ബന്ധമാണ്​ ഉണ്ടായിരുന്നതെന്ന്​ വാൾമാർട്ട്​ അന്വേഷണത്തിൽ കണ്ടെത്തിയെന്ന്​ റിപ്പോർട്ടുകളുണ്ടായിരുന്നു.