കോർ​പ്പറേറ്റുകൾക്ക്​ കോടികളുടെ നികുതിയിളവ്​ നൽകിയിട്ടും വളർച്ചയുണ്ടായില്ലെന്ന്​ മുഖ്യ സാമ്പത്തിക ഉപദേഷ്​ടാവ്​

ന്യൂഡൽഹി: കോർപ്പറ്റ്​ നികുതിയും പലിശ നിരക്കും​ കുറച്ച തീരുമാനങ്ങൾ സമ്പദ്​വ്യവസ്ഥയിൽ വീണ്ടും വളർച്ചയുണ്ടാക്കുന്നതിൽ പരാജയപ്പെട്ടുവെന്ന്​ മുഖ്യസാമ്പത്തിക ഉപദേഷ്​ടാവ്​ കൃഷ്​ണമൂർത്തി സുബ്രഹ്​മണ്യൻ. കോവിഡ്​ മൂലമാണ്​ 2019-20 സാമ്പത്തിക വർഷത്തിലെ അവസാനപാദത്തിലെ വളർച്ചാ നിരക്ക്​ 3.1 ശതമാനമായി ഇടിഞ്ഞത്​. ഇത്​ മൂലമാണ്​ സമ്പദ്​വ്യവസ്ഥയെ കരകയറ്റുന്നതിനായി പ്രഖ്യാപിച്ച പരിഷ്​കാരങ്ങൾ ഫലം കാണാതെ പോയതെന്നും അദ്ദേഹം ന്യൂസ്​ 18 ചാനലിന്​ നൽകിയ അഭിമുഖത്തിൽ പറഞ്ഞു.

സാമ്പത്തിക വർഷത്തി​​​െൻറ അവസാനപാദത്തിൽ ലോക്​ഡൗൺ അഞ്ച്​ ദിവസത്തേക്ക്​ മാത്രമാണ്​ ഉണ്ടായിരുന്നത്​. എങ്കിലും കോവിഡ്​ ഫെബ്രുവരി മുതൽ തന്നെ ഇന്ത്യൻ സമ്പദ്​വ്യവസ്ഥയെ സ്വാധീനിക്കാൻ തുടങ്ങിയിരുന്നു. രാജ്യത്തി​​​െൻറ ഉപഭോഗം കോവിഡ്​ മൂലം ഫെബ്രുവരി മുതൽ തന്നെ ഇടിഞ്ഞിരുന്നുവെന്നും അദ്ദേഹം പറഞ്ഞു.

വി ആകൃതിയിലായിരിക്കും ഇന്ത്യൻ സമ്പദ്​വ്യവസ്ഥയുടെ തിരിച്ച്​ വരവ്​. മാന്ദ്യത്തിലേക്ക്​ പോയതിന്​ ശേഷം ഇന്ത്യ ശക്​തമായി തിരിച്ചു വരും. റേറ്റിങ്​ ഏജൻസികൾ ഇന്ത്യയുടെ റേറ്റിങ്​ താഴ്​ത്തിയത്​ കാര്യമാക്കുന്നിന്നില്ല. വായ്​പ തിരിച്ചടക്കാൻ 100 ശതമാനം ശേഷി ഇന്ത്യൻ സമ്പദ്​വ്യവസ്ഥക്കുണ്ട്​. 30ഒാളം ​രാജ്യങ്ങളുടെ റേറ്റിങ്,​ ​ഏജൻസികൾ താഴ്​ത്തിയിട്ടുണ്ടെന്നും അദ്ദേഹം വ്യക്​തമാക്കി. 

ജനങ്ങൾ പണം നേരിട്ട്​ കൈമാറുന്നതുമായി ബന്ധപ്പെട്ട ചോദ്യത്തിന്​ ചെറുകിട വ്യവസായങ്ങൾക്ക്​ സഹായം നൽകുകയാണ്​ സർക്കാറി​​​െൻറ ഇപ്പോഴത്തെ ലക്ഷ്യമെന്ന്​ അദ്ദേഹം പറഞ്ഞു. ചെറുകിട വ്യവസായങ്ങൾക്ക്​ തൊഴിൽ കൂടുതലായി നൽകാൻ കഴിയുമെന്നും അദ്ദേഹം കൂട്ടിച്ചേർത്തു.