ജയ്​ ഷാക്ക്​ നൽകിയ വായ്​പകളിൽ 4,000 ശതമാനത്തി​െൻറ വർധന

ന്യൂഡൽഹി: അമിത്​ ഷായുടെ മക​ൻ ജയ്​ ഷായുടെ കമ്പനിക്ക്​ ലഭിച്ച വായ്​പയിൽ വൻ വർധനയെന്ന്​ റിപ്പോർട്ട്​. 2013-2014 വർഷത്തിൽ ജയ്​ ഷായുടെ രണ്ട്​ കമ്പനികൾക്ക്​ വായ്​പയായി ലഭിച്ചത്​ 1.3 കോടി രൂപ മാത്രമായിരുന്നു. എന്നാൽ അടുത്ത വർഷം ജയ്​ ഷായുടെ കമ്പനികൾക്ക്​ 53.4 കോടി വായ്​പയായി ലഭിച്ചു. എകദേശം 4,000 ശതമാനത്തി​​െൻറ വർധനയാണ്​ വായ്​പയിൽ രേഖപ്പെടുത്തിയിരിക്കുന്നതെന്ന്​  എൻ.ഡി.ടി.വി റിപ്പോർട്ട്​ ചെയ്യുന്നു​.

2004ൽ പ്രവർത്തനമാരംഭിച്ച ജയ്​ ഷായുടെ ടെമ്പിൾ എൻറർ​പ്രൈസസ്​​ പ്രൈവറ്റ്​ ലിമിറ്റഡിന്​ മികച്ച ​പ്രവർത്തി പരിചയം ഇല്ല​. ആരംഭിച്ച്​ പത്ത്​ വർഷത്തിന്​ ശേഷം 18.8 ലക്ഷം മാത്രമാണ്​ കമ്പനിയുടെ ലാഭം. എന്നാൽ 2015ൽ ബാങ്കിങ്​ ഇതര സാമ്പത്തിക  സ്ഥാപനമായ കിഫ്​സിൽ നിന്നും 15.76 കോടി ജയ്​ ഷായുടെ കമ്പനിക്ക്​ വായ്​പയായി അനുവദിച്ചിട്ടുണ്ട്​. ഇതേ കുറിച്ചുള്ള ചോദ്യത്തിന്​ പ്രധാനമന്ത്രിയുടെ പ്രത്യേക പദ്ധതി പ്രകാരം 88 കോടി രൂപ വായ്​പ അനുവദിച്ചിരുന്നു എന്നാണ്​ സ്ഥാപനം പറയുന്നത്​. ഇൗ പദ്ധതി പ്രകാരമാണ്​ ജയ്​ ഷായുടെ കമ്പനിക്കും വായ്​പ അനുവദിച്ചിരിക്കുന്നതെന്നാണ്​ കിഫ്​സ്​ നൽകുന്ന വിശദീകരണം. എന്നാൽ കാര്യമായ ലാഭമില്ലാത്ത ജയ്​ ഷായുടെ കമ്പനിക്ക്​ ഇത്രയും തുക വായ്​പ അനുവദിച്ചത്​ സംബന്ധിച്ച്​ വിശദീകരണം നൽകാൻ കിഫ്​സ്​ തയാറായിട്ടില്ല. 

2012ൽ പ്രവർത്തനമാരംഭിച്ച  ജയ്​ ഷായുടെ നേതൃത്വത്തിലുള്ള കുസുമം ഫിൻസേർവ്​ എന്ന കമ്പനിക്ക്​ വായ്​പ അനുവദിച്ചതിലും ക്രമക്കേടുകൾ നടന്നിട്ടുണ്ടെന്നാണ്​ എൻ.ഡി.ടി.വി റിപ്പോർട്ട്​ ചെയ്യുന്നത്​. ആദ്യ വർഷം കമ്പനി 36,500 രൂപ നഷ്​ടത്തിലായിരുന്നു. പിന്നീട്​ 2014ൽ 1.73 കോടി ലാഭത്തിലേക്ക്​ കമ്പനി എത്തി. 2015ൽ കലുപൂർ സഹകരണബാങ്ക്​ 25 കോടി ഇൗ സ്ഥാപനത്തിന്​ വായ്​പയായി അനുവദിക്കുകയായിരുന്നു. ഇതിലും ക്രമക്കേടുകൾ നടന്നിട്ടുണ്ടെന്നാണ്​ വാർത്തകൾ. ആർ.ബി.​െഎ ചട്ടങ്ങളനുസരിച്ച്​ അർബൻ സഹകരണ ബാങ്കുകൾ ഒാഹരി ദല്ലാൾ കമ്പനികൾക്ക്​ വായ്​പ നൽകുന്നതിൽ നിയ​ന്ത്രണമുണ്ട്​. ജയ്​ ഷാക്ക്​ വേണ്ടി കലുപൂർ സഹകരണ ബാങ്ക്​ ചട്ടങ്ങൾ മറികടന്നെന്നാണ്​ ആരോപണം. എന്നാൽ ലാഭ-നഷ്​ടങ്ങളില്ലാതെയാണ്​ ജയ്​ ഷായുടെ കമ്പനി പ്രവർത്തിക്കുന്നതെന്നാണ്​ ഇതുസംബന്ധിച്ച്​ ബി.ജെ.പി വൃത്തങ്ങൾ ന്യായീകരിക്കാൻ ശ്രമിച്ചത്​. അതേസമയം, ലാഭകരമല്ലാതെ പ്രവർത്തിക്കുന്ന സ്ഥാപനത്തിന്​ എങ്ങനെയാണ്​ വായ്​പ ലഭിക്കുക എന്ന ചോദ്യത്തിന്​ മുന്നിൽ അവരും മൗനം പാലിക്കുന്നു.