ചില്ലറ പണപ്പെരുപ്പം ഉയര്‍ന്നു

ന്യൂഡല്‍ഹി: തുടര്‍ച്ചയായ രണ്ടാം മാസവും വര്‍ധിച്ച ചില്ലറ പണപ്പെരുപ്പം ഒക്ടോബറില്‍ അഞ്ചു ശതമാനത്തിലേക്ക് ഉയര്‍ന്നു. ചില ഭക്ഷ്യധാന്യങ്ങളുടെ വില ക്രമാതീതമായി ഉയര്‍ന്നതും ഉത്സവകാലത്തെ വര്‍ധിച്ച ആവശ്യവുമാണ് പണപ്പെരുപ്പത്തിന് വഴിവെച്ചത്. ഉപഭോക്തൃ വിലസൂചിക അടിസ്ഥാനത്തിലുള്ള പണപ്പെരുപ്പം സെപ്റ്റംബറില്‍ 4.41 ശതമാനമായിരുന്നു. കഴിഞ്ഞ വര്‍ഷം ഒക്ടോബറില്‍ 4.62 ശതമാനമായിരുന്നു പണപ്പെരുപ്പം. പണപ്പെരുപ്പം ഉയര്‍ന്നതോടെ അടുത്ത മാസത്തെ വായ്പാനയത്തില്‍ റിസര്‍വ് ബാങ്ക് പലിശനിരക്ക് കുറക്കാനുള്ള സാധ്യത കുറഞ്ഞു. ഒക്ടോബറിലെ മൊത്ത ഭക്ഷ്യവിലപ്പെരുപ്പം 5.25 ശതമാനമാണ്.