ജീവനക്കാർക്ക്​ രണ്ട്​ പി.എഫ്​ അക്കൗണ്ട്​; നികുതി ഈടാക്കാൻ പുതിയ ക്രമീകരണവുമായി ധനമന്ത്രാലയം

ന്യൂഡൽഹി: എംപ്ലോയീസ്​ പ്രോവിഡൻറ്​ ഫണ്ടിലേക്ക്​ പ്രതിവർഷം 2.50 ലക്ഷം രൂപയിൽ അധികം തുക അടക്കുന്നവരിൽനിന്ന്​ നികുതി ഈടാക്കുന്നതിന്​ പ്രത്യേക ക്രമീകരണവുമായി ധനമന്ത്രാലയം. ഈ വിഭാഗത്തിൽ പെടുന്ന ജീവനക്കാരുടെ പി.എഫ്​ അക്കൗണ്ട്​ രണ്ടായി വിഭജിച്ചു കൊണ്ട്​ നികുതി കണക്കാക്കാൻ ആദായ നികുതി ചട്ടങ്ങൾ ഭേദഗതി ചെയ്​ത്​ ധനമന്ത്രാലയം വിജ്​ഞാപനം ഇറക്കി.

പി.എഫിലേക്ക്​ അടക്കുന്ന തുകയും പലിശയും നികുതി രഹിതമാണ്​. എന്നാൽ രണ്ടര ലക്ഷത്തിൽ കൂടുതലാണ്​ വിഹിതമെങ്കിൽ അതി​െൻറ പലിശക്ക്​ നികുതി ഈടാക്കുമെന്ന്​ കഴിഞ്ഞ ബജറ്റിൽ പ്രഖ്യാപിച്ചിരുന്നു. അതനുസരിച്ചാണ്​ 2021-22 സാമ്പത്തിക വർഷം മുതൽ നികുതി ഈടാക്കാൻ പാകത്തിൽ അക്കൗണ്ട്​ വിഭജിക്കുന്ന നടപടി കൊണ്ടുവന്നത്​. പ്രതിമാസം ശരാശരി 21,000 രൂപയിൽ താഴെ മാത്രം പി.എഫിലേക്ക്​ തൊഴിലാളി, തൊഴിലുടമ വിഹിതമായി അടക്കുന്ന ജീവനക്കാർക്ക്​ അക്കൗണ്ട്​ വിഭജനം ബാധകമല്ല.

എം​പ്ലോയീസ്​ പ്രോവിഡൻറ്​ ഫണ്ട്​ ഓർഗനൈസേഷനും തൊഴിലുടമക്കും ഏറെ പ്രയാസം സൃഷ്​ടിക്കുന്നതാണ്​ അക്കൗണ്ട്​ വിഭജന രീതി. രണ്ടര ലക്ഷം രൂപയിൽ കൂടുതൽ വരുന്ന തുകയും പലിശയും രണ്ടാമത്തെ അക്കൗണ്ടിലേക്ക്​ മാറ്റി പലിശ നികുതി വിധേയമാക്കുകയാണ്​ ചെയ്യുന്നത്​. നികുതി ഇ.പി.എഫ്​.ഒ പിടിച്ച്​ സർക്കാറിലേക്ക്​ നൽകും. ഇത്​ ടി.ഡി.എസിൽ കാണിക്കുകയാണോ, ഇ.പി.എഫ്​.ഒ നികുതി ഈടാക്കിയ സർട്ടിഫിക്കറ്റ്​ ജീവനക്കാരന്​ നൽകുകയാണോ ചെയ്യുന്നതെന്ന്​ വിജ്​ഞാപനം വ്യക്​തമാക്കിയിട്ടില്ല.

2021 മാർച്ച്​ 31ന്​ പി.എഫ്​ അക്കൗണ്ടിലുള്ള വാർഷിക വിഹിതം രണ്ടര ലക്ഷം രൂപയിൽ കൂടുതലാണെങ്കിൽ അക്കൗണ്ട്​ വിഭജനം നടത്തും. തുടർന്ന്​ ഈ അക്കൗണ്ടിലേക്ക്​ വരുന്ന തുകക്കും പലിശക്കും ജീവനക്കാർ നികുതി നൽകേണ്ടി വരും. രാജ്യത്ത്​ ആകെ 24.77 കോടി ഇ.പി.എഫ്​ അക്കൗണ്ടുകളുണ്ട്​. 2020 മാർച്ച്​ 31 വരെ ഇതിൽ14.36 കോടി പേർക്ക്​ സവിശേഷ അക്കൗണ്ട്​ നമ്പർ (യു.എ.എൻ) നൽകിയിട്ടുണ്ട്​. 2019-20 സാമ്പത്തിക വർഷത്തെ കണക്കു പ്രകാരം ഇതിൽ അഞ്ചു കോടിയോളം പേർ വിഹിതം അടച്ചു പോരുന്നുണ്ട്​.