ജി.എസ്.ടി റിട്ടേൺ ഫയൽ; വേണം വ്യാപാരി സൗഹൃദ സമീപനം

ജി.എസ്​.ടി നടപ്പാക്കിയപ്പോൾ വ്യാപാരികൾ അഭിമുഖീകരിച്ച ഏറ്റവും വലിയ വെല്ലുവിളിയായിരുന്നു റിട്ടേൺ ഫയൽ ചെയ്യുക എന്നത്​. നടപ്പാക്കുന്നതിനു മുമ്പ്​ സർക്കാർ പഠിപ്പിച്ച നിലയിലായിരുന്നില്ല നടപ്പാക്കിക്കഴിഞ്ഞപ്പോഴുള്ള അവസ്ഥ. പല പരിഷ്കരണങ്ങളിലൂടെ ഇപ്പോൾ കൃത്യതയാർന്ന റിട്ടേൺ ഫയൽ ചെയ്യുന്നതിലേക്ക്​ എത്തിയിട്ടുണ്ട്​. പക്ഷേ, ഇപ്പോഴും നിയമത്തിന്‍റെ കാർക്കശ്യങ്ങളുണ്ട്​.

ലളിതമായി റിട്ടേൺ ഫയൽ ചെയ്യാനുള്ള സംവിധാനമാണ്​ വ്യാപാരികൾ ആഗ്രഹിക്കുന്നത്​. എല്ലാ ഉൽപന്നങ്ങളും എച്ച്​.എസ്​.എൻ കോഡ്​ അടിസ്ഥാനമാക്കി റിട്ടേൺ ഫയൽ ചെയ്യണമെന്ന്​ നിഷ്കർഷിക്കുന്നു. വിറ്റുവരവ് അടിസ്ഥാനമാക്കി എച്ച്​.എസ്​.എൻ കോഡ് മിനിമം നാലെണ്ണം​ സർക്കാർ പറഞ്ഞിരിക്കുന്നു. മിനിമം എണ്ണംമതി എന്നു പറയുമ്പോഴും വിറ്റുവരവ് കൂടുമ്പോൾ അതുപോര എന്നും​ പറയുന്നു.​ തിരുത്തപ്പെടേണ്ടതാണിത്​.

കച്ചവടത്തിലെ മത്സരം കടുത്തതായതുകൊണ്ട്​ ചെലവുകൾ പരമാവധി കുറച്ച്​ വിലകുറച്ച്​ ഉൽപന്നങ്ങൾ കൊടുത്താലേ ഉപഭോക്​താവിനെ പിടിച്ചുനിർത്താൻ സാധിക്കൂ. ജി.എസ്​.ടി പ്രാക്ടീഷണർമാരെ ഉപയോഗിച്ചാണ്​ വ്യാപാരികൾ റിട്ടേൺ ഫയൽ ചെയ്യുന്നത്​. റിട്ടേണിൽ തെറ്റ്​ സംഭവിച്ചാൽ ഉത്തരവാദി വ്യാപാരിയാണ്​. കൺസൾട്ടന്‍റിന്​ ഒരു ഉത്തരവാദിത്തവുമില്ല. ഓരോരുത്തരും ഓരോ സോഫ്​റ്റ്​വെയർ ഉപയോഗിച്ചാണ്​ റിട്ടേൺ ഫയൽ ചെയ്യുന്നത്​. ഇതുകാരണം തെറ്റുകൾ ഉണ്ടാകുന്നുണ്ട്​. കൃത്യതയാർന്ന റിട്ടേൺ ഫയൽ ചെയ്യുന്നതിന്​ ലളിതമായ പൊതു സോഫ്റ്റ്​വെയർ ആവശ്യമാണ്​.

വ്യാപാരികൾ ശ്രദ്ധിക്കണം

അയോഗ്യമായ ഐ.ടി.സി (ഇൻപുട്ട്​ ടാക്സ്​ ക്രെഡിറ്റ്​) രേഖപ്പെടുത്തുന്നതിൽ വ്യാപാരികൾ പരാജയപ്പെടുന്നുണ്ട്​. ചെറുകിട വ്യാപാരികൾക്ക്​ മാനദണ്ഡങ്ങൾ മുഴുവൻ പാലിച്ച്​ റിട്ടേൺ ഫയൽ ചെയ്യുക​ ബുദ്ധിമുട്ടാണ്​. അതിനുള്ള സാ​ങ്കേതികവിദ്യ അവർക്ക് അറിയില്ല. ജി.എസ്​.ടി റിട്ടേൺ ഫയൽ ചെയ്യുമ്പോൾ തെറ്റായ ഇൻപുട്ട്​ ടാക്സ്​ ക്രെഡിറ്റ്​ എടുത്തിട്ടുണ്ടെങ്കിൽ അത്​ പിന്നീട്​ വ്യാപാരികൾക്ക്​ വലിയ സാമ്പത്തിക ബാധ്യത ഉണ്ടാക്കും​. തങ്ങൾക്ക്​ സാധനങ്ങൾ വിതരണം ചെയ്യുന്നയാൾ കൃത്യമായി നികുതി അടച്ചിട്ടുണ്ടോ, അംഗീകൃത വ്യാപാരിയാണോ എന്നും അറിയണം.

റിട്ടേൺ ഫയൽ ചെയ്തുകഴിഞ്ഞാൽ തിരുത്തിന്​ അവസരമില്ല എന്ന് അറിയുക. ജി.എസ്​.ടിക്കുമുമ്പ്​ വാറ്റായിരുന്നപ്പോൾ റിട്ടേൺ ഫയൽ ചെയ്​താൽ രണ്ടു​മാസത്തിനിടയിൽ തെറ്റുകൾ ബോധ്യപ്പെട്ടാൽ തിരുത്തുന്നതിന്​ അവസരമുണ്ടായിരുന്നു. ജി.എസ്​.ടി റിട്ടേണിൽ ഇതില്ല. തങ്ങൾക്ക്​ കിട്ടിയിരിക്കുന്ന എല്ലാ പർച്ചേ​സ്​ ബില്ലുകളും ശരിയായവിധത്തിൽ അക്കൗണ്ട്​ ചെയ്തിട്ടുണ്ടോ, അതിന്​ അവർ ബില്ലിൽ കാണിച്ച എച്ച്​.എസ്​.എൻ കോഡുകൾ ശരിയാണോ, അതിലെ നികുതി നിരക്കുകൾ ശരിയാണോ എന്നിവ ഉറപ്പുവരുത്തണം.

തങ്ങൾക്ക്​ ഡീലർമാർ തന്നിരിക്കുന്ന ക്രെഡിറ്റ്​ നോട്ടുകൾ ഫൈനാൻഷ്യൽ ക്രെഡിറ്റ്​ നോട്ടാണോ, ടാക്സബിൾ ക്രെഡിറ്റ്​ നോട്ടാണോ എന്ന്​​ ഉറപ്പു​വരുത്തണം. ടാക്സബിൾ ക്രെഡിറ്റ്​ നോട്ടാണെങ്കിൽ അതിന്‍റെ നികുതി​ തിരിച്ചടക്കേണ്ടതാണ്​. എന്തെങ്കിലും ഉൽപന്നങ്ങൾ വാങ്ങിയിട്ട്​ വിൽക്കാൻ പറ്റാതെ തിരികെ കൊടുത്തിട്ടുണ്ടോ, അങ്ങനെ തിരിച്ചുകൊടുത്തിട്ടുണ്ടെങ്കിൽ ആ ഉൽപന്നത്തിന്‍റെ നികുതി സർക്കാറിലേക്ക്​ തിരിച്ചടക്കേണ്ടതാണ്​. ഇങ്ങനെ ഇൻപുട്ട് ടാക്സ്​ എടുത്ത എന്തെങ്കിലും ഉൽപന്നങ്ങൾ വിൽക്കാതെ തിരിച്ചുകൊടുക്കുകയോ സ്ഥാപനത്തിൽവെച്ച്​ കേടുപാടുകൾ സംഭവിക്കുകയോ വ്യാപാരം മെച്ചപ്പെടുത്തുന്നതിന്‍റെ ഭാഗമായി സൗജന്യമായി നൽകുകയോ ചെയ്തിട്ടുണ്ടെങ്കിൽ അതിന്‍റെയെല്ലാം ഇൻപുട്ട്​ തിരിച്ചടക്കേണ്ട ബാധ്യത വ്യാപാരിക്കുള്ളതാണ്​.

അതിനാൽ റിട്ടേൺ ഫയൽ ചെയ്യുമ്പോൾ ഇൻപുട്ടിൽ​ രേഖപ്പെടുത്തിയ ഏതെങ്കിലും ഉൽപന്നത്തിന്‍റെ ഇൻപുട്ട്​ തിരിച്ചടക്കാനു​ണ്ടോ എന്ന്​ ഉറപ്പു​വരുത്തണം. ഏതെങ്കിലും ഉൽപന്നം സ്ഥാപനത്തിന്‍റെ പേരിൽ വാങ്ങിയിട്ടുണ്ടെങ്കിൽ (ഉദാഹരണത്തിന്​ കാർ, ബൈക്ക്​ തുടങ്ങിയവ) ഇതിന്‍റെ നികുതി കൊടുത്തിട്ടുള്ളതുമാണ്​ എങ്കിൽ ഇതിന്​ ഇൻപുട്ട്​ എടുക്കാൻ പാടില്ലാത്തതാണ്​. ഇതിന്‍റെ ക്രെഡിറ്റ്​ സൈറ്റിലുണ്ട്​ എങ്കിൽ അത്തരം ഇൻ എലിജിബിൾ ഐ.ടി.സി ഐറ്റങ്ങൾ മാറ്റി പ്രത്യേകം രേഖപ്പെടുത്തേണ്ടതാണ്​. അല്ലാതെ അതിന്​ തെറ്റായി ഇൻപുട്ട്​ എടുത്താൽ എപ്പോഴെങ്കിലും അസസ്​മെന്‍റ്​ എടുക്കുമ്പോൾ കണ്ടെത്തിയാൽ അതിന്​ പലിശ സഹിതം പിഴ ഒടുക്കേണ്ടിവരും. അതിനാൽ റിട്ടേൺ ഫയൽ ചെയ്യുമ്പോൾ തെറ്റായ ഇൻപുട്ട്​ എടുക്കാൻ പാടില്ല. ഏതെങ്കിലും ഇൻപുട്ട്​ എടുത്തതിൽ തിരിച്ചടക്കേണ്ടതായിട്ടുണ്ടെങ്കിൽ തിരിച്ചടക്കണം. നിർബന്ധമായും ശ്രദ്ധിക്കേണ്ട കാര്യമാണിത്​.

ജി.എസ്​​​.ടി.ആർ 1 ഫയൽ ചെയ്യുന്ന തീയതി നീട്ടണം

നിലവിൽ വ്യാപാരികൾ എല്ലാമാസവും 11നു മുമ്പ്​ ജി.എസ്​​​.ടി.ആർ 1 ഫയൽ ചെയ്യുന്നു. 20 ആകുമ്പോൾ 3 ബി ഫയൽ ചെയ്യുന്നു. ഒരുമാസത്തെ കണക്കുകൾ എല്ലാം ക്ലോസ്​ ചെയ്ത്​ ശരിയായ പരിശോധനകൾ നടത്തി ജി.എസ്​​​.ടി.ആർ 1 ഫയൽ ചെയ്യാൻ 15ാം തീയതിലേക്ക്​ മാറ്റണമെന്നാണ്​ വ്യാപാരികളുടെ ആവശ്യം. കാരണം ഭൂരിഭാഗം വ്യാപാരികളും കൺസൾട്ടൻസികൾ മുഖേനയാണ്​ റിട്ടേൺ ഫയൽ ചെയ്യുന്നത്​. ​ അതിന്​ ലഭിക്കുന്ന സമയം പരിമിതമാണ്​. 3ബി ഫയൽ ചെയ്യാനുള്ള തീയതി 25 ആക്കണം.

വാർഷിക ഓഡിറ്റിങ്ങാണ്​ വേണ്ടത്​

2017 - 18ൽ നടപ്പാക്കിയ ജി.എസ്​.ടി നാലുവർഷം കൊണ്ടാണ്​ എങ്ങനെയാണ്​ റിട്ടേൺ ഫയൽ ​ചെയ്യേണ്ടത്​ എന്നൊക്കെയുള്ള കാര്യങ്ങളിൽ വ്യവസ്ഥാപിതമായ രൂപം ഉരുത്തിരിഞ്ഞത്​. ആ നാലുവർഷം അറിയാതെ ഒത്തിരി തെറ്റുകൾ രജിസ്​ട്രേഡ്​ വ്യാപാരികൾക്ക്​ സംഭവിച്ചിട്ടുണ്ട്​. അതിനാൽ​ വ്യാപാരി സമൂഹത്തിന്‍റെ ആവശ്യം ആദ്യ​ത്തെ നാലുവർഷം പ്രാഥമിക ഘട്ടമായി കണക്കാക്കി ആസമയത്തെ തെറ്റുകൾക്ക്​ പിഴയും പിഴപ്പലിശയും ഒഴിവാക്കണമെന്നാണ്​. ഈ​ ആവശ്യം ഇനിയും പരിഗണിച്ചിട്ടില്ല. ഇപ്പോൾ ഓഡിറ്റ്​ നടത്തുമെന്ന്​ സർക്കാർ പ്രഖ്യാപിച്ചിട്ടുണ്ട്​. അഞ്ചുവർഷത്തെ കണക്കുകളാണ്​ ഒരുമിച്ച്​ പരിശോധിക്കുന്നത്​. ആദ്യത്തെ നാലുവർഷത്തെ ഓഡിറ്റിൽ നിന്ന്​ ഒഴിവാക്കുകയാണ്​ വേണ്ടത്​. അഞ്ചുവർഷത്തെ ഓഡിറ്റ്​ ഒരുമിച്ച്​ നടത്തുന്നത്​ തെറ്റായ രീതിയാണ്​.

പല സ്ഥാപനങ്ങളിലും മുൻകാലങ്ങളിൽ ഇത്​ ചെയ്തിരുന്നവർ വേറെ തൊഴിൽ തേടിപ്പോയിട്ടുണ്ടാകും. അത്തരം സ്ഥാപനങ്ങൾ പ്രതിസന്ധിയിലാകും. ഓഡിറ്റ്​ എന്നത്​ വ്യാപാരികളുടെ തെറ്റ്​ കണ്ടെത്താനുള്ളതാകാതെ തെറ്റുകൾ തിരുത്തുന്നതിനുള്ള അവസരമാക്കി മാറ്റുന്ന രീതിയാക്കണം​. ഓഡിറ്റ്​ കച്ചവടക്കാരെ ശിക്ഷിക്കാനാവരുത്​.

(സംസ്ഥാന ജി.എസ്​.ടി ഗ്രീവൻസ്​ റിഡ്രെസ്സൽ കമ്മിറ്റി അംഗവും കേരള മർച്ചൻറ്സ്​​ ചേംബർ ഓഫ്​ കോമേഴ്​സ്​ മുൻ പ്രസിഡന്‍റും ഓൾ കേരള ഡിസ്​ട്രിബ്യൂട്ടേഴ്​സ്​ അസോസിയേഷൻ സംസ്ഥാന നിർവാഹക സമിതി അംഗവുമാണ്​ ലേഖകൻ) തയാറാക്കിയത്​: ബിനു ഡി. രാജ്​