അംബാനിയുടെയും കുടുംബത്തി​െൻറയും ഇസെഡ്​ പ്ലസ്​ സുരക്ഷ പിൻവലിക്കണമെന്ന ഹരജി തള്ളി സുപ്രീംകോടതി

ന്യൂഡൽഹി: റിലയൻസ്​ ഇൻഡസ്​ട്രീസ്​ ചെയർമാൻ മുകേഷ്​ അംബാനിക്കും കുടുംബത്തിനും നൽകിയ ഇസഡ്​ പ്ലസ് സെക്യൂരിറ്റി പിൻവലിക്കണമെന്ന്​ ആവശ്യപ്പെട്ടുള്ള പൊതുതാൽപര്യ ഹരജി സുപ്രീംകോടതി തള്ളി. വ്യക്​തികൾക്കുള്ള ഭീഷണി വിലയിരുത്തുകയും അവലോകനം ചെയ്യുകയും അത്തരം വിഷയങ്ങളിൽ ആഹ്വാനം നടത്തുകയും ചെയ്യുന്നത്​ സംസ്ഥാനങ്ങളുടെ ചുമതലയാണെന്നും കോടതി നിരീക്ഷിച്ചു. ബോംബെ ഹൈക്കോടതിയുടെ 2019 ഡിസംബറിലെ ഉത്തരവിനെതിരെ ഹിമാൻഷു അഗർവാൾ എന്നയാൾ നൽകിയ ഹരജി ജസ്റ്റിസ് അശോക് ഭൂഷൺ അധ്യക്ഷനായ ബെഞ്ചാണ്​ തള്ളിയത്​.

ഗുരുതരമായ ഭീഷണികൾ കണക്കിലെടുത്ത്​ തങ്ങളുടെ ജീവൻ സംരക്ഷിക്കുന്നതിനായി സുരക്ഷയുടെ മുഴുവൻ ചെലവുകളും വഹിക്കാൻ തയ്യാറുള്ള വ്യക്​തികൾക്ക്​ ഇസഡ്​ പ്ലസ്​ സരുക്ഷ നൽകാൻ സംസ്ഥാനം ബാധ്യസ്ഥമാണെന്നായിരുന്നു ബോംബെ ഹൈക്കോടതി വ്യക്​തമാക്കിയത്​. സുരക്ഷക്കായുള്ള മുഴുവൻ ചെലവുകളും വഹിക്കാൻ അംബാനി കുടുംബം തയ്യാറാണെന്നും ഹൈക്കോടതി അറിയിച്ചിരുന്നു.