ഐ.എം.പി.എസ്​ സംവിധാനം; ഇടപാട്​ പരിധി രണ്ടുലക്ഷത്തിൽനിന്ന്​ അഞ്ചുലക്ഷമായി ഉയർത്തി

ന്യൂഡൽഹി: എളുപ്പത്തിൽ പണം കൈമാറ്റം ചെയ്യുന്നതിന്​ ഉപയോഗിക്കുന്ന ഐ.എം.പി.എസ്​ (ഇമ്മീഡിയേറ്റ്​ പേയ്​മെന്‍റ്​ സർവിസ്​) സംവിധാനത്ത​ിന്‍റെ ഇടപാട്​ പരിധി രണ്ടുലക്ഷം രൂപയിൽനിന്ന്​ അഞ്ചുലക്ഷമായി ഉയർത്തി റിസർവ്​ ബാങ്ക്​. വായ്​പ അവലോകന യോഗത്തിന്​ ശേഷം ആർ.ബി.ഐ ഗവർണർ ശക്തികാന്ത ദാസ്​ അറിയിച്ചതാണ്​ ഇക്കാര്യം.

ഐ.എം.പി.എസ്​ സംവിധാനം വഴി 24*7 സമയവും ഒരു ബാങ്കിൽനിന്ന്​ മറ്റൊരു ബാങ്കിലേക്ക്​ പണം കൈമാറ്റം ചെയ്യാൻ സാധിക്കും. ഉ​പ​േഭാക്താക്കൾക്ക്​ എളുപ്പത്തിൽ കൈകാര്യം ചെയ്യാമെന്നതാണ്​ ഇതിൽ പ്രധാനം. അതിനാൽ തന്നെ ഇടപാട്​ പരിധി രണ്ടുലക്ഷം രൂപയിൽനിന്ന്​ അഞ്ചുലക്ഷമായി ഉയർത്തും' -ശക്തികാന്ത ദാസ്​ പറഞ്ഞു.

2010ലാണ്​ ഐ.എം.പി.എസ്​ സംവിധാനം ആവിഷ്​കരിച്ചത്​. നാഷനൽ പേയ്​മെന്‍റ്​ കോർപറേഷൻ ഇന്ത്യയാണ്​ ഈ ഇലക്​ട്രോണിക്​ ഫണ്ട്​ ട്രാൻസ്​ഫർ സംവിധാനം കൈകാര്യം ചെയ്യുന്നത്​. മൊബൈൽ ഫോൺ വഴി ഈ സംവിധാനം പ്രയോജനപ്പെടുത്താൻ സാധിക്കും. ബാങ്ക്​ അവധി ദിവസങ്ങളിലും 24 മണിക്കൂറും ഈ സേവനം ലഭ്യമാകും.

പുതിയ വായ്​പ നയവും റിസർവ്​ ബാങ്ക്​ ഗവർണർ ശക്തികാന്ത ദാസ്​ പ്രഖ്യാപിച്ചു. റിപ്പോ, റിവേഴ്​സ്​ റിപ്പോ നിരക്കുകളിൽ മാറ്റമില്ല. റിപ്പോ നിരക്ക്​ നാലുശതമാനമായും റിവേഴ്​സ്​ റിപ്പോ നിരക്ക്​ 3.35 ശതമാനമായും തുടരും. തുടർച്ചയായ എട്ടാംതവണയാണ്​ നിരക്കുകളിൽ മാറ്റമില്ലാതെ തുടരുന്നത്​.

വാണിജ്യബാങ്കുകൾ റിസർവ്​ ബാങ്കിൽനിന്ന്​ എടുക്കുന്ന വായ്​പക്ക്​ ചുമത്തുന്ന പലിശ നിരക്കാണ്​ റിപ്പോ​. വാണിജ്യബാങ്കുകളുടെ കരുതൽ പണത്തിന്​ റിസർവ്​ നൽകുന്ന പലിശയാണ്​ റിവേ​ഴ്​സ്​ റിപ്പോ.

കോവിഡ്​ രണ്ടാം തരംഗത്തെ തുടർന്നുണ്ടായ സാമ്പത്തിക പ്രതിസന്ധിയും പണപ്പെരുപ്പ ആശങ്കയുമാണ്​ നിരക്കുകളിൽ മാറ്റമില്ലാതെ തുടരാനുള്ള തീരുമാനത്തിലെത്തിച്ചത്​.