ഐ.എൻ.എക്‌സ് മീഡിയ ഉടമകള്‍ അംബാനിയും കുടുംബവും; വിവാദമായി പീറ്റർ മുഖർജിയുടെ 2018ലെ മൊഴി

ന്യൂഡൽഹി: 'ഐ.എൻ.എക്‌സ് മീഡിയയുടെ ഉടമകള്‍ അംബാനിയും അദ്ദേഹത്തി​െൻറ കുടുംബവും സുഹൃത്തുക്കളുമാണെന്ന്'​ 2018ൽ എൻഫോഴ്​സ്​മെൻറ്​​ ഡയറക്​ടറേറ്റിന് (ഇഡി)​ പീറ്റര്‍ മുഖര്‍ജി നല്‍കിയ മൊഴി വിവാദമാവുന്നു. കുപ്രസിദ്ധമായ ഐ.എൻ.എക്‌സ് മീഡിയ കൈക്കൂലി കേസുമായി ബന്ധപ്പെട്ടുള്ള ഇൗ സുപ്രധാന മൊഴിയിൽ യാതൊരു അന്വേഷണവും അന്ന്​ നടന്നിരുന്നില്ല. അതേസമയം, മുഖ്യപ്രതിയും ടെലിവിഷൻ എക്​സിക്യൂട്ടീവുമായ പീറ്റർ മുഖർജിയും ഭാര്യ ഇന്ദ്രാണി മുഖർജിയും നൽകിയ മൊഴിയുടെ അടിസ്ഥാനത്തിൽ മുൻ മന്ത്രി പി. ചിദംബരവും അദ്ദേഹത്തി​െൻറ മകൻ കാർത്തി ചിദംബരവും അറസ്റ്റിലായിരുന്നു.

ചിദംബരവുമായും മകനുമായും അംബാനി നേരിട്ട് ബന്ധപ്പെട്ടിരുന്നുവെന്നും റിലയൻസുമായുള്ള അവരുടെ ദൈനംദിന ഇടപാടുകൾ അവരുടെ എക്സിക്യൂട്ടീവുകൾ വഴിയാണെന്നും പീറ്റർ മുഖർജിയ ഇ.ഡിയോട് പറഞ്ഞു. അതോടൊപ്പം കാര്‍ത്തി ചിദംബരത്തിന്​ നല്‍കിയ കൈക്കൂലി അംബാനിയുടെ കമ്പനിയാണ് നല്‍കിയത്. പീറ്റര്‍ മുഖര്‍ജിയും ഇന്ദ്രാണിയും നിന്നിരുന്ന സ്ഥാപനത്തി​െൻറ ഉടമസ്ഥാവകാശം മറയാക്കിയാണ് ഇതെല്ലാം ചെയ്തതെന്നുമാണ്​ മൊഴി.

അതേസമയം ചിദംബരത്തെയും മകന്‍ കാര്‍ത്തിയെയും ഇഡി ചോദ്യം ചെയ്യാന്‍ വിളിച്ച് വരുത്തുകയും, അവരെ അറസ്റ്റ് ചെയ്യുകയും ചെയ്തു. എന്നാല്‍ മുകേഷ് അംബാനിയെയോ അദ്ദേഹവുമായി ബന്ധപ്പെട്ടവരെയോ ചോദ്യം ചെയ്യാന്‍ വിളിപ്പിച്ചിട്ടില്ല. അവർ കേസില്‍ ഉള്‍പ്പെട്ടിട്ടുണ്ടെന്ന് പറയാൻ​ പോലും ഇഡിക്ക് സാധിച്ചിട്ടുമില്ല. റിലയന്‍സിനെതിരായ വെളിപ്പെടുത്തലുകള്‍ അന്വേഷിക്കാന്‍ ഇഡി ശ്രമിച്ചില്ല. എന്നാൽ, രണ്ട് വര്‍ഷമായിട്ടും ചിദംബരത്തെ വേട്ടയാടുന്നതിലാണ് അവര്‍ താല്‍പര്യം കാണിക്കുന്നത്​.

ഇക്കാര്യത്തെ കുറിച്ചുള്ള തങ്ങളുടെ ചോദ്യങ്ങള്‍ക്ക് ഇതുവരെ ഇഡി മറുപടി നല്‍കിയിട്ടില്ലെന്ന്​ 'ദ വയർ' വെബ്​പോർട്ടൽ റിപ്പോർട്ട്​ ചെയ്യുന്നു. 'ദ വയർ' ഇതുമായി ബന്ധപ്പെട്ടുള്ള ചോദ്യാവലി റിലയന്‍സ് ഇൻഡസ്​ട്രീസിന്​ അയച്ചെങ്കിലും ഇതുവരെ അക്കാര്യത്തില്‍ കമ്പനി പ്രതികരിച്ചിട്ടില്ല. ഇഡി ഈ വിഷയത്തില്‍ പ്രതികരിക്കാന്‍ അനുവാദമില്ലെന്നാണ് അറിയിച്ചതെന്നും റിപ്പോർട്ടിൽ ചൂണ്ടിക്കാട്ടുന്നു​.

മുകേഷ് അംബാനിക്ക് വേണ്ടി 40 ശതമാനം ഓഹരികള്‍ ഇന്ദ്രാണിയുടെ കൈവശമായിരുന്നുവെന്നും പീറ്റര്‍ മുഖര്‍ജിയുടെ മൊഴിയിൽ പറയുന്നുണ്ട്​. എൻ.എസ്​.ആർ.പി അംബാനിയുടെ സുഹൃത്തുക്കളുടെ കൈവശം ഉണ്ടായിരുന്ന കമ്പനിയാണെന്നും, ഇവര്‍ മറ്റൊരു 20 ശതമാനം ഓഹരി കൂടി കമ്പനിയില്‍ നേടിയിരുന്നുവെന്നും മൊഴിയിലുണ്ട്. മൊത്തം 60 ശതമാനം ഓഹരി ഇങ്ങനെ അംബാനി കുടുംബത്തി​െൻറയും സുഹൃത്തുക്കളുടെയും പേരിലായിരുന്നുവെന്ന് പീറ്റര്‍ മുഖര്‍ജി പറയുന്നു.