മുൻ വർഷത്തേക്കാൾ ധനികനായി മോദി ; പ്രധാനമന്ത്രിയുടെ സ്വത്ത്​ വിവരങ്ങൾ ഇതാണ്​

ന്യൂഡൽഹി: പ്രധാനമന്ത്രി നരേന്ദ്ര മോദിയുടെ ആസ്​തിയിൽ വർധന. പ്രധാനമന്ത്രിയുടെ വെബ്​സൈറ്റ്​ പ്രകാരം മോദിയുടെ ആസ്​തി 3.07 കോടിയായാണ്​ വർധിച്ചത്​. കഴിഞ്ഞ വർഷം ഇത്​ 2.85 കോടിയായിരുന്നു. 22 ലക്ഷം രൂപയുടെ വർധനയാണ്​ ഒരു വർഷം കൊണ്ട്​ ഉണ്ടായത്​.

മാർച്ച്​ 31ലെ കണക്കുകൾ പ്രകാരം മോദിക്ക്​ ബാങ്ക്​ ബാലൻസായി 1.5 ലക്ഷം രൂപയുണ്ട്​. 36,000 രൂപ പണമായും കൈവശമുണ്ട്​. ഗുജറാത്തിലെ ഗാന്ധിനഗർ ബ്രാഞ്ചിലെ സ്ഥിരനിക്ഷേപം വർധിച്ചതാണ്​ മോദിയുടെ ആസ്​തിയുടെ വർധനക്കും ഇടയാക്കിയത്​. ഗാന്ധിനഗർ എസ്​.ബി.ഐ എൻ.എസ്​.സി ബ്രാഞ്ചിലെ സ്ഥിരനിക്ഷേപം 1.6 കോടിയിൽ നിന്ന്​ 1.86 കോടിയായി വർധിച്ചു.

ഓഹരി വിപണിയിലോ മ്യൂച്ചൽഫണ്ടിലോ മോദിക്ക്​ നിക്ഷേപമില്ല. നാഷണൽ സേവിങ്​സ്​ സർട്ടിഫിക്കറ്റിൽ 8,93,251 രൂപയുടെ നിക്ഷേപമുണ്ട്. ഇൻഷൂറൻസിൽ 1,50,957 രൂപയും എൽ&ടി ഇൻഫ്രാസ്​ട്രക്​ചർ ബോണ്ടിൽ 20,000 രൂപയും നിക്ഷേപിച്ചിട്ടുണ്ട്​. 1.48 ലക്ഷം രൂപയുടെ രണ്ട്​ സ്വർണ മോതിരങ്ങൾ മോദിക്ക്​ സ്വന്തമായുണ്ട്​. ഇതിന്​ പുറമേ 1.1 കോടിയുടെ വസ്​തുവിൽ 25 ശതമാനം ഒാഹരി പങ്കാളിത്തവും അദ്ദേഹത്തിനുണ്ട്​. ഗുജറാത്ത്​ മുഖ്യമന്ത്രിയാവുന്നതിന്​​ മുമ്പ്​ 1.3 ലക്ഷം രൂപയുടെ വസ്​തുവും മോദി വാങ്ങി.