3.25 ലക്ഷം കോടിയുടെ റ​ഫാൽ യുദ്ധ വിമാനക്കരാറിന് അനുമതി നൽകി ഇന്ത്യ

മുംബൈ: ഫ്രാൻസിൽനിന്ന് 114 റ​ഫാൽ യുദ്ധ വിമാനങ്ങൾ വാങ്ങാൻ ഇന്ത്യ. ഇതിനായി 3.25 ലക്ഷം കോടി രൂപയുടെ കരാറിന് രാജ്യം അംഗീകാരം നൽകി. ഈ അടുത്ത കാലത്ത് ഇന്ത്യ നടത്തുന്ന ഏറ്റവും വലിയ പ്രതിരോധ സംഭരണ കരാറുകളിലൊന്നാണിത്. റ​ഫാൽ യുദ്ധ വിമാനങ്ങൾ വ്യോമസേനക്ക് കൂടുതൽ കരുത്ത് പകരുമെന്നാണ് സൂചന. പ്രതിരോധ മന്ത്രി രാജ്നാഥ് സിങ് അധ്യക്ഷനായ പ്രതിരോധ ഏറ്റെടുക്കൽ കൗൺസിലാണ് (ഡിഫൻസ് അക്വിസിഷൻ കൗൺസിൽ) കരാറിന് അനുമതി നൽകിയത്.

കരാറിന് പ്രതിരോധ സംഭരണ ​​ബോർഡ് നേരത്തെ അംഗീകാരം നൽകിയിരുന്നു. ഇതേതുടർന്നാണ് കരാറിന്റെ വിശദമായ സാങ്കേതിക, വാണിജ്യ ചർച്ചകളുടെ അവസാന ഘട്ടത്തിലേക്ക് കടന്നത്. കരാർ പ്രകാരം ഇന്ത്യ 114 റ​ഫാൽ വിമാനങ്ങൾ വാങ്ങും. ഇതിൽ 18 ജെറ്റുകൾ പൂർണമായും നിർമിച്ചാണ് രാജ്യത്തെത്തിക്കുക. ബാക്കിയുള്ളവ ആഭ്യന്തരമായി നിർമിക്കുകയും ചെയ്യും. മേക് ഇൻ ഇന്ത്യ പദ്ധതിയിൽ ഉൾപ്പെടുത്തിയാണ് 90 യുദ്ധ വിമാനങ്ങൾ ആഭ്യന്തരമായി നിർമിക്കുക.

പുതിയ കരാറോടെ ഇന്ത്യ സ്വന്തമാക്കുന്ന റ​ഫാൽ വിമാനങ്ങളുടെ എണ്ണം 176 ആയി ഉയരും. നിലവിൽ 36 റ​ഫാൽ വിമാനങ്ങൾ വ്യോമസേനയിലുണ്ട്. 26 റ​ഫാൽ-എം ജെറ്റുകൾ നാവിക സേനയാണ് ഓർഡർ ചെയ്തത്. ഒരു സീറ്റുള്ള 88 വിമാനങ്ങളും രണ്ട് സീറ്റുള്ള 26 വിമാനങ്ങളുമാണ് വ്യോമസേനക്ക് ലഭിക്കുക. ഇന്ത്യയിലെ സ്വകാര്യ കമ്പനികളും ഫ്രാൻസിന്റെ എയറോസ്​പേസ് കമ്പനിയായ ദസോൾട്ട് ഏവിയേഷനും ചേർന്നായിരിക്കും ആഭ്യന്തരമായി റ​ഫാൽ നിർമിക്കുക. പദ്ധതി രാജ്യത്തെ പ്രതിരോധ നിർമാണ മേഖലക്ക് ഉണർവ് പകരുമെന്നാണ് പ്രതീക്ഷിക്കുന്നത്.

അതിനൂത സെൻസറുകളും ദീർഘദൂര ആക്രമണ ശേഷിയുമുള്ള റ​ഫാൽ യുദ്ധ വിമാനങ്ങൾ ഇതിനകം തന്നെ പ്രതിരോധ സേനയുടെ നെടുംതൂണായി മാറിയിട്ടുണ്ട്. അഞ്ചാം തലമുറയിൽപെട്ട അത്യാധുനിക യുദ്ധ വിമാന (അഡ്‍വാൻസ്ഡ് മീഡിയം കോംപാറ്റ് എയർക്രാഫ്റ്റ്) നിർമാണം രാജ്യത്തെ സ്വകാര്യ കമ്പനികൾ തുടങ്ങാനിരിക്കെയാണ് റ​ഫാൽ ജെറ്റുകൾ വാങ്ങുന്നത്.