സ്​നേഹ രക്​തം കൊണ്ട്​ വിനുത കടം വീട്ടി; നിധീഷ്​ ഇതറിയുന്നുണ്ടോ?

കുവൈത്ത്​ സിറ്റി: തനിക്ക്​ രക്​തം നൽകാനായി ഒരു മനുഷ്യ സ്​നേഹി ഖത്തറിൽനിന്ന്​ കുവൈത്തിലേക്ക്​ പറന്നെത്തിയപ്പോൾ വിനുത ദയാനന്ദ​ മനസ്സിൽ കുറിച്ചിട്ട ഒരു കടം ഉണ്ടായിരുന്നു. 2017ൽ വിനുതയുടെ പ്രസവ ശസ്ത്രക്രിയക്കായി ബി.ഡി.കെ പ്രവർത്തകർ ഖത്തറിൽ നിന്നും നിധീഷ് രഘുനാഥ് എന്ന ബോംബെ ഗ്രൂപ്പ് ദാതാവിനെ എത്തിച്ച് രക്തദാനം നടത്തിയിരുന്നു. അന്നത്​ വലിയ വാർത്തയായതാണ്​.

ഇപ്പോൾ ഇബ്​നുസീന ആശുപത്രിയിൽ രണ്ടാഴ്ചലധികമായി ചികിത്സയിലുള്ള കുട്ടിക്ക്​ അടിയന്തര ശസ്​ത്രക്രിയക്കായി ബോംബെ ഗ്രൂപ്പ്​ രക്​തം ആവശ്യമായി വന്നപ്പോൾ തുണയായത്​ അതേ വിനുത. പത്തുലക്ഷത്തിൽ നാലുപേർക്ക്​ മാത്രം കാണുന്ന ബോംബെ ഗ്രൂപ്പ് എന്ന അപൂർവ രക്​തം ദാനം നടത്തിയാണ്​ ബ്ലഡ്​ ഡോണേഴ്​സ്​ കേരള കുവൈത്ത്​ രക്തദാനസേന അംഗവും മംഗലാപുരം സ്വദേശിനിയുമായ വിനുത ദയാനന്ദ ശ്രദ്ധേയയായത്​. സെപ്​റ്റംബർ രണ്ടാം വാരത്തിലാണ്​ രക്​തബാങ്ക്​ അധികൃതർ ബി.ഡി.കെ പ്രതിനിധികളെ ബന്ധപ്പെടുന്നത്​.

ബി.​ഡി.കെ ഡാറ്റ ബേയ്​സിൽ ഉണ്ടായിരുന്നതിനാൽ അപൂർവ ഗ്രൂപ്പ്​ രക്​തദാതാവിനെ എളുപ്പം കണ്ടെത്താൻ കഴിഞ്ഞു. രണ്ടാഴ്ചത്തെ തയറെടുപ്പിലൂടെയാണ് രക്തദാനത്തിനാവശ്യമായ ഹീമോഗ്ലോബിൻ നില ആർജ്ജിച്ചത്. തുടർന്ന് രക്തദാതാനത്തിനാവശ്യമായ മുന്നൊരുക്കങ്ങൾ നടത്തി. റോയൽ ഹയാത്ത് ആശുപത്രിയിൽ ടെക്നീഷ്യൻ ആണ്​ വിനുത. ജോലിത്തിരക്കിനിടയിലും ഭർത്താവിനൊപ്പം രാവിലെ തന്നെ രക്തദാനത്തിനായി എത്തി മടങ്ങു​േമ്പാൾ അവർക്ക്​ നിറഞ്ഞ സംതൃപ്​തി. ജാബിരിയ സെൻട്രൽ ബ്ലഡ് ബാങ്കിലാണ്​ അപൂർവ്വ രക്തഗ്രൂപ്പിൽ പെട്ട ബോംബെ രക്തദാനം നടന്നത്​. 1952ൽ മുംബയിൽ ഡോ. ഭെൻഡേയാണ് ഈ രക്തഗ്രൂപ്പ് ആദ്യമായി തിരിച്ചറിഞ്ഞത്.

മഹാരാഷ്​ട്രയിലും അതിനോടു ചേർന്ന കർണ്ണാടകയുടെ ചില പ്രദേശങ്ങളിലുമാണ് ബോംബേ ഓ പോസിറ്റീവ് രക്തം ഉള്ളവരെ കൂടുതലായി തിരിച്ചറിഞ്ഞിട്ടുള്ളത്. അതിനാലാണ് ഈ രക്തഗ്രൂപ്പിന് ബോംബെ ഗ്രൂപ്പ് എന്ന പേരു വരാൻ കാരണം. 10ലക്ഷത്തിൽ നാലുപേർക്കാണ് ഈ രക്​ത ഗ്രൂപ്പ് കാണുക എന്നാണ് റിപ്പോർട്ട്.