​കോപയിൽ അർജൻറീന- ബ്രസീൽ സ്വപ്​ന ഫൈനൽ

സവോപോളോ: പെനാൽറ്റി വിധി നിർണയിച്ച തകർപ്പൻ പോരാട്ടത്തിൽ കൊളംബിയയെ മറികടന്ന അർജൻറീന കോപ ഫൈനലിൽ​ ബ്രസീലിനെ നേരിടും. കളിയുടെ തുടക്കത്തിൽ ഗോളടിച്ച്​ അർജൻറീന മുന്നിലെത്തിയ രണ്ടാം സെമിയിൽ 61ാം മിനിറ്റിലെ ഗോളുമായി കൊളംബിയ ഒപ്പമെത്തിയതിനൊടുവിലാണ്​ പെനാൽറ്റിയിലേക്ക്​ നീങ്ങിയതും അർജൻറീന ഗോളി മാർടിനെസി​െൻറ മികവിൽ ടീം കലാശപ്പോരിന്​ ടിക്കറ്റുറപ്പിച്ചതും.

1993നു ശേഷം ആദ്യമായി കോപ സെമിയിൽ ഇരുവരും മുഖാമുഖം വന്ന കളിയിൽ ഗോളോടെ തുടങ്ങിയത്​ അർജൻറീന. ഏഴാം മിനിറ്റിൽ മെസ്സി ഒരുക്കിയ പാസിൽ ​ലോടറോ മാർടിനെസ്​ അനായാസം വല കുലുക്കുകയായിരുന്നു. ചുറ്റും വളഞ്ഞുനിന്ന മൂന്നു പ്രതിരോധ താരങ്ങളെ കടന്നായിരുന്നു മെസ്സി സഹതാരത്തി​െൻറ കാലിന്​ കണക്കാക്കി പന്ത്​​ നൽകിയത്​. മുന്നിൽ ഒഴിഞ്ഞുനിന്ന വിശാലമായ പോസ്​റ്റിലേക്ക്​ അടിച്ചുകയറ്റാൻ മാർടിനെസിന്​ കാത്തുനിൽക്കേണ്ടിവന്നില്ല. ടൂർണമെൻറിൽ മെസ്സിയുടെ അഞ്ചാം അസിസ്​റ്റായിരുന്നു ഇത്​.

തൊട്ടുപിറകെ കൊളംബിയ നീലക്കുപ്പായക്കാരെ കടന്ന്​ പന്തുമായി അർജൻറീന ഗോൾമുഖ​ത്തെത്തിയെങ്കിലും പിഴച്ചു. ആക്രമണം കനപ്പിച്ച്​ കൊളംബിയ പോർമുഖം തുറന്നതോടെ ഇരു പകുതികളിലും പന്ത്​ നിരന്തരം കയറിയിറങ്ങി. അടുത്ത ​ഗോൾ പിറവിക്ക്​ പക്ഷേ, രണ്ടാം പകുതിയുടെ കാൽമണിക്കൂർ പൂർത്തിയാകേണ്ടിവന്നു. കളിയിലുടനീളം അപകടകാരികാരിയായി ഒാടിനടന്ന ഡയസായിരുന്നു സമനില ഗോൾ കണ്ടെത്തിയത്​. ഇടതുവശത്തുനിന്ന്​ അസാധ്യ ആംഗിളിൽനിന്നായിരുന്നു തലവെച്ച്​ ഡയസി​െൻറ മനോഹര ഗോൾ.

കളി ഒപ്പമെത്തിയതോടെ അർജൻറീന മുൻനിരയിൽ നികൊളാസ്​ ഗോൺസാലസിനു പകരം എയ്​ഞ്ചൽ ഡി മരിയയെ കൊണ്ടുവന്നു. അത്​ ഫലിച്ചെന്ന്​ തോന്നിച്ച്​ 80ാം മിനിറ്റിൽ ഡി മരിയ നൽകിയ സുവർണ ക്രോസ്​ മെസ്സി അടിച്ചത്​ പോസ്​റ്റിൽ തട്ടി മടങ്ങി. പ്രതിരോധനിരയിലെ രണ്ടു പേരെ ചടുലനൃത്തവുമായി കടന്നായിരുന്നു ഡി മരിയയുടെ പാസ്​. ഇഞ്ച്വറി സമയത്ത്​ ഒരിക്കൽ കൂടി വലയിലേക്ക്​ പായിച്ച മെസ്സിയുടെ പന്ത്​ പോസ്​റ്റിൽ തട്ടി മടങ്ങിയതോടെ പെനാൽറ്റി കളി തീരുമാനിച്ചു.

നേരത്തെ ഉറപ്പാക്കാമായിരുന്നു ഫൈനൽ പ്രവേശനം രണ്ടു വട്ടം പോസ്​റ്റിലടിച്ച്​ കളഞ്ഞതി​െൻറ ക്ഷീണം പക്ഷേ, മെസ്സി പെനാൽറ്റിയിൽ കാണിച്ചില്ല. ടീമിനായി ആദ്യം കിക്കെടുത്ത താരം പരിഭവമില്ലാതെ വലയിലെത്തിച്ചു.

കൊളംബിയക്കായി ക്വാഡ്രാഡോ, ബോർയ എന്നിവർ ലക്ഷ്യം കണ്ടപ്പോൾ ഡേവിൻസൺ സാഞ്ചസ്​, യെറി മീന, എഡ്വിൻ കാർഡോണ എന്നീ മൂന്നു പേരുടെ കിക്ക്​ അർജൻറീന ഗോൾകീപർ എമിലിയാനോ മാർടിനെസി​െൻറ കൈകളിൽ വിശ്രമിച്ചു. അർജൻറീനക്കുവേണ്ടി മെസ്സിക്കു പുറമെ പരേഡെസ്​, ലോടറോ മാർടിനെസ്​ എന്നിവരും ലക്ഷ്യം കണ്ടു.

മാറക്കാനയിൽ ശനിയാഴ്​ചയാണ്​ ബ്രസീലുമായി സ്വപ്​നഫൈനൽ. ​മൂന്നാം സ്​ഥാനക്കാരെ നിർണയിക്കാനുള്ള ​ലൂസേഴ്​സ്​ ഫൈനലിൽ കൊളംബിയ വെള്ളിയാഴ്​ച പെറുവിനെ നേരിടും.