പുതിയ സ്വിഫ്​റ്റും പഴയ സ്വിഫ്​റ്റും, എന്തൊക്കെയാണ്​ മാറ്റങ്ങൾ? അറിയാം ഇക്കാര്യങ്ങൾ

മാരുതി സുസുക്കി അവരുടെ ഏറ്റവും ജനപ്രിയ മോഡലുകളിലൊന്നായ സ്വിഫ്​റ്റിൽ പരിഷ്​കരണംവരുത്തി പുറത്തിറക്കിയിരിക്കുന്നു. പുതിയ വാഹനത്തിൽ നിരവധി മാറ്റങ്ങളാണ്​ കമ്പനി വരുത്തിയിട്ടുള്ളത്​. പുറത്തുള്ള മാറ്റങ്ങൾക്കുപുറമേ കൂടുതൽ ഇന്ധനക്ഷമത, പുതിയ ഫീച്ചറുകൾ, ഡ്യുവൽ ടോൺ കളർ ഓപ്ഷനുകൾ എന്നിവ ഉൾപ്പെടുത്തിയിട്ടുണ്ട്​. എല്ലാത്തിനുംപുറമേ കരുത്തുറ്റ എഞ്ചിനും പുതിയ സ്വിഫ്റ്റിൽ മാരുതി ഉൾപ്പെടുത്തിയിട്ടുണ്ട്​.

5.73 മുതൽ 8.41 ലക്ഷംവരെ വില വരുന്ന സ്വിഫ്റ്റിന് പഴയ മോഡലിനേക്കാൾ 15,000 മുതൽ 24,000 രൂപ വരെ കൂടുതലാണ്. സ്വിഫ്റ്റ് വി.എക്സ്​.ഐ വേരിയന്‍റിന്​​ പുതിയ ഓഡിയോ യൂനിറ്റ് ലഭിക്കും. എ.എം.ടി വേരിയന്‍റിൽ ഹിൽ‌ സ്റ്റാർട്ട് അസിസ്റ്റ്​ സ്റ്റാൻ‌ഡേർഡാണ്​. സ്മാർട്ട് പ്ലേ സ്റ്റുഡിയോ ആപ്ലിക്കേഷനുമായി യോജിപ്പിക്കുമ്പോൾ ഇൻഫോടെയ്ൻമെന്‍റ്​ സിസ്റ്റം തത്സമയ ട്രാഫിക് ഡാറ്റ കാണിക്കുമെന്നതും പ്രത്യേകതയാണ്​.

ഡിസൈൻ

പുതിയ സ്വിഫ്റ്റിന് ബോൾഡർ ഗ്രില്ലുള്ള സ്‌പോർട്ടിയയായ രൂപമാണുള്ളത്​. നേരത്തേ ഉണ്ടായിരുന്ന തിരശ്ചീന തലത്തിലുള്ള പാറ്റേണിനുപകരം പരിഷ്​കരിച്ച ഗ്രില്ലിൽ ക്രോസ് മെഷ് ഡിസൈനാണുള്ളത്​. ഗ്രില്ലിന്‍റെ മധ്യഭാഗത്ത് ക്രോം ബാർ സ്ഥാപിച്ചിരിക്കുന്നു. ഇത് സ്വിഫ്റ്റിനെ​ രൂപത്തിൽ സ്പോർട്ടിയാക്കുന്നു. ഇതൊഴിച്ചാൽ രൂപത്തിൽ വാഹനത്തിന്​ വേറേ മാറ്റങ്ങളില്ല.

പുതിയ നിറങ്ങൾ

മുമ്പത്തെ ആറ് സിംഗിൾ ടോൺ ഓപ്ഷനുകളോടൊപ്പം പുതിയ ഡ്യുവൽ-ടോൺ നിറങ്ങളും ഉൾപ്പടുത്തിയിട്ടുണ്ട്​. കറുത്ത മേൽക്കൂരയുള്ള പേൾ ആർട്ടിക് വൈറ്റ് ബോഡി, കറുത്ത മേൽക്കൂരയുള്ള സോളിഡ് ഫയർ റെഡ് ബോഡി, വെളുത്ത മേൽക്കൂരയുള്ള മെറ്റാലിക് മിഡ്‌നൈറ്റ് ബ്ലൂ എന്നിവയാണ്​ ഡ്യൂവൽ ടോൺ നിറങ്ങൾ. പുതിയ സ്വിഫ്റ്റ് നേരിയ തോതിൽ വളർന്നിട്ടുണ്ട്​. മുമ്പത്തെ മോഡലിന് 3840 മില്ലിമീറ്ററായിരുന്നു നീളമെങ്കിൽ ഇപ്പോഴത്​ 3845 മില്ലീമീറ്ററാണ്​. അഞ്ച്​ മില്ലിമീറ്റർ കൂടിയെന്ന്​ സാരം. വീതി, ഉയരം, വീൽബേസ് തുടങ്ങിയവ -1735 മില്ലീമീറ്റർ, 1530 മില്ലീമീറ്റർ, 2450 മില്ലീമീറ്റർ- മാറ്റമില്ലാതെ തുടരുന്നു.

ഡ്യുവൽ ജെറ്റ് എഞ്ചിൻ

പഴയ 83 എച്ച്പി, 1.2 ലിറ്റർ കെ 12 എഞ്ചിന് പകരം കൂടുതൽ കരുത്തുറ്റ 90 എച്ച്പി 1.2 ലിറ്റർ ഡ്യുവൽ ജെറ്റ് പെട്രോൾ യൂനിറ്റാണ്​ പുതിയ സ്വിഫ്​റ്റിൽ വരിക. കഴിഞ്ഞ വർഷം ഡിസയറിൽ അവതരിപ്പിച്ച എഞ്ചിനാണിത്​. ടോർക്ക് ഔട്ട്‌പുട്ട് 113എൻ.എം ആണ്​. പുതിയ വാഹനത്തിൽ സ്റ്റാർട്ട്​ സ്​റ്റോപ്പ്​ ഫ​​ംഗ്​ഷനും ഉൾപ്പെടുത്തിയിട്ടുണ്ട്​. വാഹനം എവിടെയെങ്കിലും നിർത്തു​േമ്പാൾ എഞ്ചിൻ ഓഫാവുന്ന സംവിധാനമാണിത്​. ഇന്ധനക്ഷമത അൽപ്പം വർധിക്കുമെന്നതാണ്​ ഇതിന്‍റെ മെച്ചം. 5 സ്പീഡ് മാനുവൽ, 5 സ്പീഡ് എഎംടി യൂണിറ്റായി ട്രാൻസ്മിഷൻ തുടരുന്നു.

ഇന്ധനക്ഷമത

പുതുക്കിയ സ്വിഫ്റ്റ്​ മാനുവൽ പതിപ്പിൽ 23.20kpl ഉം ഓട്ടോമാറ്റികിൽ 23.76kpl ഉം ആണ്​ മൈലേജ്​. പഴയ കാറിന്‍റെ 21.21kpl നെ അപേക്ഷിച്ച് കൂടുതലാണിത്​. ഗിയർബോക്സ് ഓപ്ഷനുകളിൽ അഞ്ച്​ സ്പീഡ് മാനുവൽ, അഞ്ച്​ സ്പീഡ് എഎംടി യൂനിറ്റ് എന്നിവ ഉൾപ്പെടുന്നു.

മറ്റ്​ സവിശേഷതകൾ

ഇന്‍റീരിയറിന്​ പുതുക്കിയ അപ്ഹോൾസറി ലഭിക്കും. 2021 സ്വിഫ്റ്റ് വിഎക്സിന്​ പുതിയ ഓഡിയോ യൂനിറ്റ് ഉൾപ്പെടുത്തിയിട്ടുണ്ട്​. വോളിയത്തിനും ട്രാക്ക് മാറ്റത്തിനും ഫെതർ-ടച്ച് നിയന്ത്രണങ്ങൾ ഇവയുടെ പ്രത്യേകതകളാണ്​. മുമ്പത്തെപ്പോലെ ബ്ലൂടൂത്ത്, യുഎസ്ബി, ഓക്സ് കണക്റ്റിവിറ്റി നിലനിർത്തിയിട്ടുണ്ട്​. ഏറ്റവും ഉയർന്ന മോഡലിൽ ക്രൂസ് കൺട്രോൾ, ഓട്ടോമാറ്റിക്​ ഒ.ആർ.വി.എം എന്നിവയുമുണ്ട്. എൽ‌ഇഡി ഹെഡ്‌ലാമ്പുകൾ, 7.0 ഇഞ്ച് ടച്ച്‌സ്‌ക്രീൻ, കീലെസ് എൻട്രി ആൻഡ് ഗോ, ഓട്ടോ ക്ലൈമറ്റ് കൺട്രോൾ, റിയർ വ്യൂ ക്യാമറ എന്നിവയും ഉയർന്ന വേരിയന്‍റിലുണ്ട്​. സ്മാർട്ട്‌പ്ലേ സ്റ്റുഡിയോ മൊബൈൽ അപ്ലിക്കേഷൻ വഴി തത്സമയ ട്രാഫിക് അപ്‌ഡേറ്റുകളും സിസ്റ്റം വാഗ്ദാനം ചെയ്യുന്നു.