എക്സ്​ 5 പരിഷ്കരിച്ച്​ ബി.എം.ഡബ്ല്യു; ഫേസ്​ലിഫ്​റ്റ്​ പതിപ്പിന്‍റെ വില 93.90 ലക്ഷം മുതൽ

എക്സ്​ 5 എസ്​.യു.വിയുടെ പരിഷ്കരിച്ച പതിപ്പ്​ ഇന്ത്യയിൽ പുറത്തിറക്കി ബി.എം.ഡബ്ല്യു. 93.90 ലക്ഷം മുതൽ 1.07 കോടി രൂപ എക്സ്ഷോറൂം വിലയിലാണ് മുഖം മിനുക്കിയെത്തുന്ന സ്പോർട് യൂട്ടിലിറ്റി വാഹനം കമ്പനി അവതരിപ്പിച്ചിരിക്കുന്നത്. എം സ്‌പോർട്ട്, എക്സ്​ ലൈൻ ട്രിമ്മുകൾക്കൊപ്പം വാഹനം ലഭ്യമാകും.

നിരവധി മാറ്റങ്ങളാണ്​ പുതിയ വാഹനത്തിന്​ വരുത്തിയിരിക്കുന്നത്​. ഓപ്‌ഷണൽ ഇല്യൂമിനേറ്റഡ് ഗ്രില്ലുള്ള (X5 40i പെട്രോൾ വേരിയന്റിൽ മാത്രം) റീപ്രൊഫൈൽ ചെയ്ത ഫ്രണ്ട് ബമ്പർ, ആരോ ആകൃതിയിലുള്ള എൽഇഡി ഡിആർഎല്ലുകളോട് കൂടിയ എൽഇഡി ഹെഡ്‌ലാമ്പുകൾ, പുതിയ ഡിസൈനുള്ള 21 ഇഞ്ച് അലോയ് വീലുകൾ എന്നിവയാണ്​ പുറത്തെ പ്രധാന മാറ്റങ്ങൾ. പിന്നിലെ ഒരേയൊരു മാറ്റം പുനർരൂപകൽപ്പന ചെയ്ത ടെയിൽ-ലൈറ്റുകളാണ്.

ഉള്ളിലെ ഏറ്റവും വലിയ മാറ്റം 14.9 ഇഞ്ച് ഇൻഫോടെയ്ൻമെന്റ് സ്‌ക്രീനും 12.3 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്ററും ഉൾക്കൊള്ളുന്ന പുതിയ ഇരട്ട സ്‌ക്രീൻ പാനലാണ്. ബിഎംഡബ്ല്യുവിന്റെ iDrive 8 ഓപ്പറേറ്റിംഗ് സിസ്റ്റത്തിലാണ് ഇത് പ്രവർത്തിക്കുന്നത്. സമീപകാലത്ത് പല ബിഎംഡബ്ല്യു മോഡലുകളിലും കണ്ടുപരിചയിച്ച ഒരു ഗ്ലാസ് ടോഗിൾ സ്വിച്ചാണ് ഡ്രൈവ് സെലക്ടറായി അവതരിപ്പിച്ചിരിക്കുന്നത്. ഹാർമൺ കാർഡൺ മ്യൂസിക് സിസ്റ്റം, എം സ്‌പോർട്ട് ട്രിമ്മുകളിൽ ഹെഡ്‌സ്-അപ്പ് ഡിസ്‌പ്ലേ, ആംബിയന്റ് ലൈറ്റിങ്​ എന്നിവയും അകത്തളത്തെ ഹൈലൈറ്റുകളാണ്.

എക്സ്​ ലൈൻ ട്രിമ്മുകൾക്ക് ഹീറ്റിങ്​ ഫംഗ്‌ഷനോടുകൂടിയ സ്‌പോർട് സീറ്റുകൾ ലഭിക്കും. അതേസമയം എം സ്‌പോർട്ടിന് വെന്റിലേഷനോടുകൂടിയ കംഫർട്ട് സീറ്റുകളാണ് ബിഎംഡബ്ല്യു ഒരുക്കിയിരിക്കുന്നത്. ക്രൂസ് കൺട്രോൾ, അറ്റന്റീവ്നസ് അസിസ്റ്റ്, 360-ഡിഗ്രി ക്യാമറയുള്ള പാർക്കിങ്​ അസിസ്റ്റ്, റിവേഴ്സ് അസിസ്റ്റ്, സ്മാർട്ട്ഫോൺ വഴിയുള്ള റിമോട്ട് പാർക്കിങ്​, ഡ്രൈവ് റെക്കോർഡിങ്​ എന്നിവ ഉൾപ്പെടുന്ന ഡ്രൈവർ സഹായ സംവിധാനങ്ങളും ബിഎംഡബ്ല്യു X5 ഫെയ്‌സ്‌ലിഫ്റ്റ് വാഗ്ദാനം ചെയ്യുന്നു.

പെട്രോൾ, ഡീസൽ എഞ്ചിൻ ഓപ്ഷനുകളോടെ വാഹനം ലഭ്യമാകും. രണ്ടിനും 48V മൈൽഡ്-ഹൈബ്രിഡ് സിസ്റ്റവും ലഭിക്കും. 3.0 ലിറ്റർ, സ്‌ട്രെയിറ്റ്-സിക്സ്​ പെട്രോൾ എഞ്ചിന് 381 bhp കരുത്തിൽ പരമാവധി 520 Nm ടോർക്ക്​ ഉത്പാദിപ്പിക്കാൻ കഴിയും. 3.0 ലിറ്റർ, സ്‌ട്രെയിറ്റ്-സിക്സ്​ ഡീസൽ എഞ്ചിന് 286 bhp പവറിൽ 650 Nm ടോർക്ക്​ വരെ നൽകാനാവും. രണ്ട് എഞ്ചിനുകളിലും 12 bhp, 200 Nm ടോർക്​ അധികമായി ഉത്പാദിപ്പിക്കുന്ന ഇലക്ട്രിക് മോട്ടോറും എട്ട് സ്പീഡ് ഓട്ടോമാറ്റിക് ഗിയർബോക്സും ലഭിക്കും.

പെട്രോൾ എഞ്ചിന് 5.4 സെക്കൻഡിൽ 0-100 കിലോമീറ്റർ വേഗത കൈവരിക്കാൻ കഴിയും. ഡീസലിന് ഇതേ വേഗത കൈവരിക്കാൻ ഏകദേശം 6.1 സെക്കൻഡ്​ വേണം. വേരിയന്റ് തിരിച്ചുള്ള എക്സ്ഷോറൂം വിലയിലേക്ക് നോക്കിയാൽ xDrive 40i xLine പതിപ്പിന് 93.90 ലക്ഷം, xDrive 30d xLine മോഡലിന് 95.90 ലക്ഷം, xDrive 40i M Sport വേരിയന്റിന് 1.05 കോടി രൂപ, xDrive 30d M Sport ടോപ്പ് എൻഡിന് 1.07 കോടി രൂപ എന്നിങ്ങനെയാണ് വില വരുന്നത്.