മുഖംമിനുക്കി പോളോ; ഓ​ട്ടോണമസ്​ ഡ്രൈവിങ്​ സൗകര്യം ഉൾപ്പടെ ലഭ്യമാകും

ആറാം തലമുറ ഫോക്​സ്​വാഗൺ പോളോ അന്താരാഷ്​ട്ര വിപണിയിൽ മുഖംമിനുക്കി അവതരിപ്പിച്ചു. പുതുക്കിയ സ്റ്റൈലിങും ഓ​ട്ടോണമസ്​ ഡ്രൈവിങ് ഉൾപ്പടെ കൂടുതൽ സൗകര്യങ്ങളുമായാണ്​ വാഹനം വരുന്നത്​. എഞ്ചിനുകളിൽ മാറ്റമില്ല.

ഡിസൈൻ

ഗോൾഫ്, ഐഡി 3 തുടങ്ങിയ ഫോക്‌സ്‌വാഗൺ ഹാച്ച്ബാക്കുകളുടെ രൂപകൽപ്പനയ്ക്ക് അനുസൃതമായ മാറ്റമാണ്​ പുതിയ പോളോയിലും കാണ​​ുന്നത്​. എൽഇഡി ഹെഡ്ലൈറ്റുകൾ, ഹെഡ്​ലൈറ്റുകളെ ബന്ധിപ്പിക്കുന്ന എൽഇഡി സ്ട്രിപ്പ്, പുത്തൻ ഫ്രണ്ട്, റിയർ ബമ്പറുകൾ, പുനർരൂപകൽപ്പന ചെയ്ത ടെയിൽ‌ഗേറ്റ് എന്നിവ മാറ്റങ്ങളിൽ ഉൾപ്പെടുന്നു. വി.ഡബ്ല്യൂ ബാഡ്‌ജിന് താഴെയുള്ള പോളോ ലെറ്ററിങ്​, എൽ‌ഇഡി ടെയിൽ-ലൈറ്റുകൾ എന്നിവയും പുതിയ രൂപകൽപ്പനയിൽ​െപ്പടും. ഹെഡ്​ലൈറ്റിൽ മാട്രിക്സ് സാങ്കേതികവിദ്യ ഉപയോഗിച്ചിട്ടുണ്ട്​. പോളോയിൽ ആദ്യമായാണ്​ ഐക്യു ലൈറ്റ് എന്ന് വിളിക്കുന്ന മാട്രിക്​സ്​ ഹെഡ്​ലൈറ്റ്​ ലഭ്യമാകുന്നത്​. വീൽ‌ബേസ് അതേപടി നിലനിർത്തി​. പുനർ‌നിർമ്മിച്ച ബമ്പറുകൾ‌ കാരണം ഫെയ്‌സ്‌ലിഫ്റ്റ്​ പതിപ്പിന്​ നീളം അൽ‌പ്പം കൂടുതലാണ്.

ഇന്‍റീരിയർ

പോളോ ഫെയ്‌സ്‌ലിഫ്റ്റിന് 6.5 ഇഞ്ച് ടച്ച്‌സ്‌ക്രീൻ ഉള്ള ഫോക്‌സ്‌വാഗന്‍റെ ഏറ്റവും പുതിയ ഇൻഫോടെയ്ൻമെന്‍റ്​ സിസ്റ്റം സ്റ്റാൻഡേർഡായി ലഭിക്കും. ആധുനികമായ എല്ലാ കണക്റ്റിവിറ്റി ഓപ്ഷനുകളും വാഹനം വാഗ്ദാനം ചെയ്യുന്നു. 9.2 ഇഞ്ച് വലുപ്പമുള്ള സ്​ക്രീൻ ഓപ്ഷനായി ലഭ്യമാണ്. സെന്‍റർ കൺസോളിന് താഴെയുള്ള സ്ലൈഡർ എന്ന്​ വിളിക്കുന്ന താപനില നിയന്ത്രണ സംവിധാനം ഗോൾഫിൽ നിന്ന് കൊണ്ടുവന്നതാണ്​.

8.0 ഇഞ്ച് ഡിജിറ്റൽ ഇൻസ്ട്രുമെന്‍റ്​ ഡിസ്‌പ്ലേ, പുനർരൂപകൽപ്പന ചെയ്ത മൾട്ടിഫംഗ്ഷൻ സ്റ്റിയറിംഗ് വീൽ എന്നിവയുമുണ്ട്. ഫോക്​സ്​വാഗന്‍റെ ലെവൽ ടു ഓട്ടോണമസ് ഡ്രൈവിംഗ് സംവിധാനം (ട്രാവൽ അസിസ്റ്റ്) പോളായിൽ ഓപ്ഷനലായി ലഭ്യമാണ്. പസാറ്റിലാണ്​ ഈ സംവിധാനം ആദ്യം കണ്ടത്. ഓട്ടോമേറ്റഡ് ഡ്രൈവിങ്​ പ്രാപ്തമാക്കുന്നതിന് അഡാപ്റ്റീവ് ക്രൂസ് കൺട്രോളും ലെയ്ൻ കീപ്പിങ്​ അസിസ്റ്റും ഈ സംവിധാനത്തിലുണ്ട്​.

എഞ്ചിൻ

പുതിയ പോളോയുടെ എഞ്ചിനിൽ മാറ്റമൊന്നുമില്ല. 1.0 ലിറ്റർ, മൂന്ന് സിലിണ്ടർ നാച്ചുറലി ആസ്പിറേറ്റഡ് പെട്രോൾ എഞ്ചിൻ, ടി‌എസ്‌യു ടർബോ-പെട്രോൾ എഞ്ചിൻ എന്നിവയാണ്​ വാഹനത്തിന്​ കരുത്തുപകരുന്നത്​. പവർ ഔട്ട്‌പുട്ടുകൾ 80 എച്ച്പി മുതൽ 110 എച്ച്പി വരെയാണ്. ഗിയർബോക്‌സ് ഓപ്ഷനുകളിൽ എഞ്ചിൻ, വേരിയന്‍റ്​ എന്നിവയെ ആശ്രയിച്ച് മാനുവൽ അല്ലെങ്കിൽ ഡ്യുവൽ ക്ലച്ച് ഓട്ടോമാറ്റിക് ഉൾപ്പെടുന്നു.

ഇന്ത്യൻ വിപണിയെ സംബന്ധിച്ചിടത്തോളം, ഫോക്സ്‍വാഗൺ ഇപ്പോഴും അഞ്ചാം തലമുറ പോളോയിൽ തുടരുകയാണ്​. നിലവിലെ വാഹനം ഒന്നിലധികം അപ്‌ഡേറ്റുകൾക്ക്​ വിധേയമായിട്ടുണ്ട്​. നിലവിൽ എസ്​.യു.വി മാർക്കറ്റിലാണ്​ ഫോക്​സ്​വാഗൻ ശ്രദ്ധ കേന്ദ്രീകരിക്കുന്നത്​. പുതിയ പോളോ ഉടനൊന്നും ഇന്ത്യൻ മാർക്കറ്റിൽ എത്തില്ല എന്നുതന്നെയാണ്​ ഇപ്പോൾ പറയാനാവുന്നത്​.