ഇസ്രായേൽ ആക്രമണം വഞ്ചനപരം; അപലപിച്ച്​ യു.എ.ഇ

ദുബൈ: ഖത്തർ തലസ്ഥാനമായ ദോഹയിൽ ഹമാസ്​ നേതാക്കളെ ലക്ഷ്യംവെച്ച്​ ഇസ്രായേൽ നടത്തിയ ആക്രമണത്തെ ശക്​തമായ ഭാഷയിൽ അപലപിച്ച്​ യു.എ.ഇ. ഖത്തറിന്​ എല്ലാ പിന്തുണയും ഉറപ്പുനൽകുന്നതായി യു.എ.ഇ ഉപ​പ്രധാനമന്ത്രിയും വിദേശകാര്യ മന്ത്രിയുമായ ശൈഖ്​ അബ്​ദുല്ല ബിൻ സായിദ്​ ആൽ നഹ്​യാൻ എക്സിലൂടെ അറിയിച്ചു.

അതേസമയം, ഇസ്രാ​യേൽ ആക്രമണം വഞ്ചനപരമായ നടപടിയാണെന്ന്​ യു.എ.ഇ പ്രസിഡന്‍റിന്‍റെ നയന്ത്ര ഉപദേശകൻ ഡോ. അൻവർ ബിൻ മുഹമ്മദ്​ ഗർഗാഷ്​ ആരോപിച്ചു. ഗൾഫ്​ നാടുകളുടെ സുരക്ഷ അവിഭാജ്യകരമാണെന്നും ഖത്തറിന്​ യു.എ.ഇ പൂർണ പിന്തുണ പ്രഖ്യാപിക്കുന്നുവെന്നും അദ്ദേഹം അറിയിച്ചു.