ജപ്തി ചെയ്യാനെത്തിയ ഉദ്യോഗസ്ഥർക്ക് മുന്നിൽ ആത്മഹത്യ ഭീഷണിയുമായി യുവതി

പോത്തൻകോട്: വീട് ജപ്തി ചെയ്യാനെത്തിയ ഉദ്യോഗസ്ഥർക്ക് മുന്നിൽ ആത്മഹത്യ ഭീഷണിയുമായി യുവതി. കോടതി ഉത്തരവുമായി ഉദ്യോഗസ്ഥരെത്തിയപ്പോഴാണ് പോത്തൻകോട് സ്വദേശിനിയായ ശലഭം കുപ്പിയിൽ പെട്രോളുമായി വീട്ടിനുള്ളിൽ ആത്മഹത്യഭീഷണി മുഴക്കിയത്​. തുടർന്ന് ജപ്തി നടപടികൾ നിർത്തിവെച്ച്​ ഉദ്യോഗസ്ഥർ മടങ്ങി.

പോത്തൻകോട് മേരിമാത ജങ്​ഷന് സമീപം വ്യാഴാഴ്ച ഉച്ചക്ക്​ 12ഓടെയായിരുന്നു സംഭവം. പോത്തൻകോട് കൃപ ഭവനിൽ അറുമുഖം (തമിഴ്നാട് സ്വദേശി) കച്ചവട ആവശ്യത്തിന്​ 2013ൽ എസ്.ബി.ഐ പോത്തൻകോട് ശാഖയിൽനിന്ന്​ 34 ലക്ഷം രൂപ വായ്പയെടുത്തിരുന്നു. തുടർന്ന്​ പോത്തൻകോട് ജങ്​ഷനിൽ സ്റ്റേഷനറി മൊത്തക്കച്ചവട സ്ഥാപനം തുടങ്ങി. 2014ൽ അറുമുഖം പോത്തൻകോട് നന്നാട്ടുകാവ് സ്വദേശിനി ശലഭത്തെ വിവാഹംചെയ്തു. ബാങ്ക് ലോണുള്ള വിവരം ശലഭത്തിന് അറിയില്ലായിരുന്നു. കച്ചവടം തകർന്ന്​ തിരിച്ചടവ്​ മുടങ്ങിയതോടെ 2017ൽ അറുമുഖൻ നാടുവിട്ടു.

2018ൽ ബാങ്ക് അധികൃതർ വീട് ജപ്തി ചെയ്യാൻ എത്തിയപ്പോഴായിരുന്നു ശലഭം ലോൺ വിവരമറിഞ്ഞത്. സ്വർണം വിറ്റ് പലതവണയായി 25 ലക്ഷത്തോളം രൂപ തിരിച്ചടച്ചു.

തിരിച്ചടവ് വീണ്ടും മുടങ്ങിയതോടെയാണ്​ ജപ്തിക്ക്​ ബാങ്ക് നടപടി തുടങ്ങിയത്​. വ്യാഴാഴ്ച ഉച്ചക്ക്​ 12നുള്ളിൽ വീട്​ ഒഴിയണമെന്ന് കോടതി നിയോഗിച്ച അഭിഭാഷക കമീഷൻ ബുധനാഴ്ച ശലഭത്തെ അറിയിച്ചിരുന്നു. ശലഭവും മാതാവും ആറുവയസ്സുള്ള പെൺകുഞ്ഞും മാത്രമാണ് വീട്ടിലുണ്ടായിരുന്നത്.

പോത്തൻകോട് പൊലീസ് അനുനയിപ്പിക്കാൻ ശ്രമിച്ചെങ്കിലും ശലഭം ആത്മഹത്യഭീഷണിയിൽനിന്ന്​ പിന്മാറിയില്ല. വെമ്പായം പഞ്ചായത്ത് പ്രസിഡന്‍റ്​ ബീന ജയൻ, വൈസ് പ്രസിഡന്റ് ജഗന്നാഥൻ പിള്ള, അംഗം എം. നസീർ അടക്കം ജനപ്രതിനിധികൾ അഭിഭാഷകരുമായി സംസാരിച്ചു. കോടതി നടപടികൾ തടസ്സപ്പെടുത്തിയതിന് ശലഭത്തിനെതിരെ പോത്തൻകോട് പൊലീസ് കേസെടുത്തു. കോടതിയുടെ തീരുമാനപ്രകാരം തുടർനടപടി സ്വീകരിക്കുമെന്ന് അഭിഭാഷക കമീഷനും പൊലീസും അറിയിച്ചു.