വാക്​സിൻ വിതരണത്തെച്ചൊല്ലി ഡോക്​ടർക്ക്​ മർദനം; മൂന്ന്​ സി.പി.എം നേതാക്കൾക്കെത​ിരെ കേസ്​

കുട്ടനാട്: വാക്​സിൻ വിതരണത്തെച്ചൊല്ലിയുള്ള തർക്കത്തിൽ ഡോക്​ടർക്ക്​ മർദനം. സംഭവത്തിൽ കൈനകരി പഞ്ചായത്ത്​ പ്രസിഡൻറ്​ ഉൾപ്പെടെ മൂന്ന്​ സി.പി.എം നേതാക്കൾക്കെതിരെ പൊലീസ്​ കേസെടുത്തു. കൈനകരി പഞ്ചായത്ത്​ പ്രസിഡൻറ്​ ​ എം.സി. പ്രസാദ്, ലോക്കൽ സെക്രട്ടറി രഘുവരന്‍, പ്രവർത്തകൻ വിശാഖ് വിജയന്‍ എന്നിവർക്കെതിരെ നെടുമുടി പൊലീസാണ്​ കേസെടുത്തത്​. കൈനകരിയിലെ വാക്​സിൻ കേ​ന്ദ്രത്തിൽ ഡ്യൂട്ടിയിലുണ്ടായിരുന്ന ക​ുപ്പപ്പുറം പ്രാഥമികാരോഗ്യകേന്ദ്രത്തി​െല മെഡിക്കൽ ഓഫിസർ ഡോ. ശരത്​ച​ന്ദ്ര ബോസിനാണ്​ മർദനമേറ്റത്​. ശനിയാഴ്​ച വൈകീട്ടാണ്​ കേസിനാസ്​പദമായ സംഭവം. വാക്​സിനേഷനുശേഷം മിച്ചമുണ്ടായിരുന്ന വാക്​സിൻ വിതരണം ചെയ്യുന്നതുമായി ബന്ധപ്പെട്ട തർക്കമാണ്​ മർദനത്തിൽ കലാശിച്ചതെന്ന്​ പൊലീസ്​ പറഞ്ഞു. പഞ്ചായത്ത്​ പ്രസിഡൻറ്​ 10പേര​ുടെ ലിസ്​റ്റ്​ നൽകി അവർക്ക്​​ വാക്​സിൻ നൽകണമെന്ന്​ ആവശ്യപ്പെടുകയായിരുന്നു. ഇത്​ കിടപ്പുരോഗികൾക്കായി മാറ്റിവെച്ചതാണെന്ന്​ പറഞ്ഞപ്പോൾ തർക്കമായി. തുടർന്ന്​ കഴുത്തിനുകുത്തിപ്പിടിച്ച്​ മർദനത്തിന്​ ശ്രമിച്ചതായി ഡോ. ശരത്​ചന്ദ്രബോസ്​ പറഞ്ഞു. വാക്​സിൻ കൊടുക്കാതെ കൈനകരിവിട്ട്​ പുറത്തുപോകില്ലെന്ന്​ ഭീഷണിമുഴക്കിയതോടെ കുതറിയോടി മുറിയിൽ കയറി കതകടച്ചു. രണ്ടുമണിക്കൂറിലേറെ നേരം ​ആരോഗ്യപ്രവർത്തകരെ തടഞ്ഞുവെച്ചതിനുശേഷം പൊലീസെത്തിയാണ്​ രക്ഷപ്പെടുത്തിയത്​. അതേസമയം, വാക്​സിൻ ഉണ്ടായിട്ടും രാവിലെ മുതൽ കാത്തുനിന്നവർക്ക്​ നൽകാതെ മടക്കി അയച്ച മെഡിക്കൽ ഓഫിസറുടെ നടപടിയിൽ പ്രതിഷേധിക്കുക മാത്രമാണെന്നും ഡോക്​ടറെ കൈയേറ്റം ചെയ്​തിട്ടില്ലെന്നും പരാതി വ്യാജമാണെന്നും കൈനകരി പഞ്ചായത്ത് പ്രസിഡൻറ്​ എം.സി. പ്രസാദ് പറഞ്ഞു. ഡ്യൂട്ടി ഡോക്ടറെ ജോലി തടസ്സപ്പെടുത്തി കൈയേറ്റം ചെയ്തു, അസഭ്യം പറഞ്ഞു തുടങ്ങിയ വകുപ്പുകള്‍ ചുമത്തി കേസെടു​െത്തന്ന്​ പൊലീസ്​ പറഞ്ഞു. അതേസമയം, മാവേലിക്കരക്ക്​ പിന്നാലെ കുട്ടനാട്ടിലും ഡോക്​ടറെ ആക്രമിച്ചസംഭവത്തിൽ മുഖ്യമന്ത്രി അടക്കമുള്ളവർക്ക്​ പരാതി നൽകാൻ ഒരുങ്ങുകയാണ്​​ കെ.ജി.എം.ഒ.