കർണാടകയിൽ കൂടുതൽ സ്ഥലങ്ങളിൽ സവർക്കർ ബോർഡുകൾ

ചിത്രത്തിൽ ബി.ജെ.പി നേതാവിന്‍റെ പുഷ്പഹാരം ബംഗളൂരു: കർണാടകയിൽ കൂടുതൽ സ്ഥലങ്ങളിൽ ഹിന്ദുത്വസംഘടന പ്രവർത്തകർ ആർ.എസ്​.എസ്​ ആചാര്യൻ വി.ഡി. സവർക്കറുടെ ചിത്രം സ്ഥാപിക്കുന്നു. സ്വാതന്ത്ര്യദിനത്തോടനുബന്ധിച്ച്​ കഴിഞ്ഞ ദിവസം ശിവമൊഗ്ഗയിൽ സവർക്കറുടെ ഫോട്ടോ സ്ഥാപിച്ചതുമായി ബന്ധപ്പെട്ട്​ സംഘർഷാവസ്ഥ ഉണ്ടായിരുന്നതിന്റെ തുടർച്ചയായാണ് വീണ്ടും ചിത്രങ്ങൾ സ്ഥാപിച്ചിരിക്കുന്നത്. ഇതിനോട്​ അടുത്തുകിടക്കുന്ന ഉഡുപ്പി ജില്ലയിലും സവർക്കറുടെ ബോർഡുകൾ ഉയർന്നു. ഉഡുപ്പിയിലെ ബ്രഹ്മഗിരി സർക്കിളിലെ ഛായാചിത്രത്തിൽ ബി.ജെ.പി നേതാവ്​ യശ്​പാൽ സുവർണ പുഷ്പഹാരം ചാർത്തുകയും ചെയ്തു. ബി.ജെ.പിയുടെ ഒ.ബി.സി മോർച്ചയുടെ ദേശീയ ജനറൽ സെക്രട്ടറിയാണ്​ സുവർണ. സവർക്കറുടെ ചിത്രം മാറ്റണമെന്നും സമാധാന അന്തരീക്ഷം നിലനിർത്തണമെന്നും കോൺഗ്രസ്​ ആവശ്യപ്പെട്ടു. ഇതിൽ പ്രതിഷേധിച്ച്​ ഹിന്ദുത്വസംഘടനകൾ കോൺഗ്രസ്​ ജില്ല കമ്മിറ്റി ഓഫിസിലേക്ക്​ മാർച്ച്​ നടത്തി. ബംഗളൂരുവിനോട്​ അടുത്തുള്ള തുമകുരു ജില്ലയിലും സവർക്കറുടെ ചിത്രം അടങ്ങിയ ഫ്ലക്സ്​ പ്രത്യക്ഷപ്പെട്ടു. അജ്ഞാതരാണ്​​ ഇതിന്​ പിറകിലെന്നും സംഘർഷം ഉണ്ടാക്കുകയാണ്​ ഇവരുടെ ലക്ഷ്യമെന്നും ​കേസ്​ എടുത്തിട്ടു​ണ്ടെന്നും തുമകുരു എസ്​.പി. രാഹുൽകുമാർ പറഞ്ഞു. അതേസമയം, ശിവമൊഗ്ഗയിലെ നിരോധനാജ്ഞ ഇന്നും തുടരും. സ്വാതന്ത്ര്യദിനത്തിൽ ബജ്​റംഗ്ദൾ, വിശ്വഹിന്ദുപരിഷത്ത്​ പ്രവർത്തകർ ഇവിടെയുള്ള മുസ്​ലിംപള്ളിയോട്​ ചേർന്ന അമീർ അഹ്​മദ്​ സർക്കിളിൽ സവർക്കറുടെ ഛായാചിത്രം സ്ഥാപിച്ചതാണ്​ പ്രശ്നങ്ങളുടെ തുടക്കം. ഇത്​ ചില​ മുസ്​ലിം ചെറുപ്പക്കാർ ഇടപെട്ട്​ മാറ്റിക്കുകയും അതേ സ്ഥലത്ത്​ മൈസൂർ രാജാവായിരുന്ന ടിപ്പു സുൽത്താന്‍റെ ചിത്രമുള്ള ബോർഡ്​ സ്ഥാപിക്കാൻ ശ്രമിക്കുകയും ചെയ്തിരുന്നു. ശിവമൊഗ്ഗയിലെ സിറ്റി സെന്‍റർ മാളിൽ സിറ്റി കോർപറേഷൻ അധികൃതർ നടത്തിയ പ്രദർശനത്തിൽ സവർക്കറുടെ ചിത്രം വന്നതിലും പ്രതിഷേധമുയർന്നിരുന്നു. സ്വാതന്ത്ര്യസമരത്തിൽ ഒരു തരത്തിലും പ​ങ്കെടുത്തിട്ടില്ലാത്ത സവർക്കറെ ഉൾ​​പ്പെടുത്തുന്നതിനെയാണ്​ എതിർക്കുന്നതെന്ന്​ പ്രതിഷേധക്കാർ പറയുന്നു. - ഒ. മുസ്തഫ UDUPPI ഉഡുപ്പിയിൽ സ്ഥാപിച്ച സവർക്കറുടെ ​ചിത്രമടങ്ങിയ ബോർഡ്​