വൈദ്യുതി ലൈനിൽനിന്ന്​ തീപ്പൊരിവീണ് കൃഷിയിടം കത്തിനശിച്ചു

കങ്ങഴ: വൈദ്യുതി ലൈനിൽനിന്ന്​ തീപ്പൊരി വീണ് കൃഷിയിടത്തിൽ തീപിടിച്ചു. കങ്ങഴ തെങ്ങുംപള്ളിൽ രാജു, ജോർജ്, പുത്തൻപുരക്കൽ സണ്ണി എന്നിവരുടെ കൃഷിയിടത്തിലാണ് തീപിടിത്തമുണ്ടായത്. വ്യാഴാഴ്ച രണ്ടരയോടെയായിരുന്നു അപകടം. കരിയിലക്കൂട്ടത്തിന് തീപിടിക്കുകയും കൃഷിയിടത്തിലൂടെ കത്തിപ്പടരുകയുമായിരുന്നു. 25 റബർതൈകളും കപ്പ, വാഴ എന്നീ കൃഷികൾക്കും നാശമുണ്ടായി. ഒന്നര ഏക്കറോളം സ്ഥലത്ത്​ തീപടർന്നു. പറമ്പിൽനിന്ന്​ തീയും പുകയും ഉയരുന്നതുകണ്ട പ്രദേശവാസികൾ ചേർന്ന് വെള്ളമൊഴിച്ച് തീ നിയന്ത്രിച്ചതിനാൽ അപകടം ഒഴിവായി. തുടർന്ന് കുടിവെള്ള ടാങ്കറിൽ വെള്ളമെത്തിച്ചാണ് തീ പൂർണമായി അണച്ചത്. തീപിടിത്തമുണ്ടായ കങ്ങഴ തെങ്ങുംപള്ളി രാജുവിന്‍റെ കൃഷിയിടം