മഞ്ചേശ്വരം ബ്ലോക്ക് ഭരണം എസ്​.ഡി.പി.ഐ തീരുമാനിക്കും

മഞ്ചേശ്വരം: യു.ഡി.എഫ് കുത്തകയായി കൈവശം വെച്ചിരുന്ന മഞ്ചേശ്വരം ബ്ലോക്ക് പഞ്ചായത്ത് ഇത്തവണ ബലാബലത്തിൽ. ആകെയുള്ള 15 സീറ്റിൽ മുസ്​ലിംലീഗിനും ബി.ജെ.പിക്കും ആറു സീറ്റ് വീതമാണ് ലഭിച്ചത്. സി.പി.എം-രണ്ട്​, എസ്​.ഡി.പി.ഐ -ഒന്ന്​ എന്നിങ്ങനെയാണ് കക്ഷിനില. കഴിഞ്ഞതവണ മൂന്നു സീറ്റുണ്ടായിരുന്ന കോൺഗ്രസ് ഇത്തവണ സംപൂജ്യരായി. ഇവരുടെ കൈവശമുണ്ടായിരുന്ന രണ്ടു സീറ്റ് ബി.ജെ.പിയും ഒരെണ്ണം പിടിച്ചെടുത്ത് എസ്​.ഡി.പി.ഐ ആദ്യമായി ബ്ലോക്കിൽ അക്കൗണ്ടും തുടങ്ങി. ആറു സീറ്റ് ഉണ്ടായിരുന്ന മുസ്​ലിംലീഗ് വോർക്കാടി ഡിവിഷൻ സി.പി.എം പിടിച്ചെടുത്തപ്പോൾ പകരം ബി.ജെ.പിയുടെ കൈവശമുണ്ടായിരുന്ന ഇച്ചിലങ്കോട് തിരിച്ചുപിടിച്ച്​ സീറ്റ്നില കഴിഞ്ഞതവണത്തേതിന് തുല്യമാക്കി. നാലു സീറ്റ് ഉണ്ടായിരുന്ന ബി.ജെ.പി ഒന്നു കൈവിട്ടപ്പോൾ പകരം മൂന്ന് പിടിച്ച്​ ആകെ എണ്ണം ആറാക്കി ഉയർത്തി. പ്രസിഡൻറ്​, വൈസ് പ്രസിഡൻറ്​ തെരഞ്ഞെടുപ്പിൽ ഇടതുമുന്നണി മാറിനിൽക്കാനാണ് സാധ്യത. അങ്ങനെയെങ്കിൽ ലീഗിന് ഭരണം നേടാൻ എസ്​.ഡി.പി.ഐ പിന്തുണ അത്യാവശ്യമാണ്. അല്ലാത്തപക്ഷം വോട്ട് നില തുല്യമായാൽ നറുക്കെടുപ്പിൽ ഭാഗ്യം തുണക്കേണ്ടിവരും. ആകെ സീറ്റ്: 15 മുസ്​ലിംലീഗ്: ആറ് ബി.ജെ.പി: ആറ് സി.പി.എം: രണ്ട് എസ്​.ഡി.പി.ഐ: ഒന്ന്