ഈസ്​റ്റ്​ എളേരി പഞ്ചായത്തിൽ ആറോളം പേർക്ക് കോവിഡ്; കടുത്ത നിയന്ത്രണം

വെള്ളരിക്കുണ്ട്: ഈസ്​റ്റ്​ എളേരി പഞ്ചായത്തില്‍ ആറുപേര്‍ക്ക് കോവിഡ് സ്ഥിരീകരിച്ച സാഹചര്യത്തില്‍ പഞ്ചായത്ത് കടുത്ത നിയന്ത്രണങ്ങളിലേക്ക്. ഇരുപത്തിയഞ്ചിലെ കുടുംബാരോഗ്യ കേന്ദ്രവും പഞ്ചായത്ത് കേന്ദ്രവും വെള്ളിയാഴ്ച അടച്ചിട്ട് അണുനശീകരണം നടത്തും. കമ്പല്ലൂര്‍ ഒന്ന്, നല്ലോംപുഴ ഒന്ന്, കണ്ണിവയല്‍ നാല് എന്നിങ്ങനെയാണ് പഞ്ചായത്തില്‍ വ്യാഴാഴ്​ച കോവിഡ് സ്ഥിരീകരിച്ചവരുടെ കണക്ക്. ചിറ്റാരിക്കാല്‍, നല്ലോംപുഴ, കമ്പല്ലൂര്‍, കൊല്ലാട എന്നീ ടൗണുകള്‍ രണ്ട് ദിവസത്തേക്ക് പൂർണമായും അടച്ചിടും. പ്രാഥമിക സമ്പര്‍ക്കപ്പട്ടികയില്‍ ഉൾപ്പെട്ടവര്‍ക്കായി ശനിയാഴ്ച ആൻറിജന്‍ ടെസ്​റ്റ്​ നടത്തും. ജനങ്ങള്‍ ജാഗ്രത പാലിക്കണമെന്നും അനാവശ്യമായി പുറത്തുപോകരുതെന്നും നിർദേശം നല്‍കി. അണുനശീകരണത്തിനുശേഷം മാത്രമേ കുടുംബാരോഗ്യ കേന്ദ്രവും പഞ്ചായത്ത് കേന്ദ്രവും തുറന്നുപ്രവര്‍ത്തിക്കുകയുള്ളു. വ്യാഴാഴ്ച പഞ്ചായത്തില്‍ ചേര്‍ന്ന സര്‍വകക്ഷി യോഗത്തിലാണ് തീരുമാനം. ആരോഗ്യ പ്രവര്‍ത്തകള്‍, പഞ്ചായത്ത് അധികൃതര്‍, പൊലീസ് ഉദ്യോഗസ്ഥര്‍ തുടങ്ങിയവര്‍ യോഗത്തില്‍ പങ്കെടുത്തു.