നാണംകെട്ട രാഷ്​ട്രീയത്തിന്​ സി.പി.എം വില നൽകേണ്ടിവരും -മുസ്​ലിം ലീഗ്​

കണ്ണൂർ: വർഗീയ ധ്രുവീകരണമുണ്ടാക്കുന്ന വിഷലിപ്ത പ്രചാരണം നടത്തിയും എസ്.ഡി.പി.ഐയുമായി വ്യാപകമായും ബി.ജെ.പിയുമായും അവസരവാദ നീക്കുപോക്കിലേർപ്പെട്ടുമാണ് തെരഞ്ഞെടുപ്പിൽ സി.പി.എം നേരിയ വിജയം കൈവരിച്ചതെന്ന് ജില്ല മുസ്​ലിം ലീഗ് പ്രവർത്തക സമിതി യോഗം. മുസ്​ലിം ലീഗിനെയും യു.ഡി.എഫിനെയും പരാജയപ്പെടുത്താൻ സി.പി.എം സ്വീകരിച്ച നാണം കെട്ട രാഷ്​ട്രീയക്കളിക്ക് ഭാവിയിൽ വലിയ വില നൽകേണ്ടിവരുമെന്ന് യോഗം മുന്നറിയിപ്പ് നൽകി. പ്രസിഡൻറ്​ പി. കുഞ്ഞിമുഹമ്മദ് അധ്യക്ഷത വഹിച്ചു. ജനറൽ സെക്രട്ടറി അഡ്വ. അബ്​ദുൽ കരീം ചേലേരി, വി.കെ. അബ്​ദുൽ ഖാദർ മൗലവി, അബ്​ദുറഹിമാൻ കല്ലായി, വി.പി. വമ്പൻ, അഡ്വ. എസ്. മുഹമ്മദ്, അഡ്വ. പി.വി. സൈനുദ്ദീൻ, ടി.എ. തങ്ങൾ, ഇബ്രാഹിം മുണ്ടേരി, കെ.ടി. സഹദുല്ല, അഡ്വ. കെ.എ. ലത്തീഫ്, ഇബ്രാഹിം കുട്ടി തിരുവട്ടൂർ, അൻസാരി തില്ലങ്കേരി, കെ.പി. താഹിർ, എം.പി.എ. റഹീം എന്നിവർ സംസാരിച്ചു.